Средбата меѓу претседателот на Барселона, Пеп Марија Бартомеу, и таткото на Лионел Меси – Хорхе, заврши без двете страни да донесат конкретна одлука.
-Мојот син не сака да остане овде – порача Хорхе, таткото на Меси.
Барселона е категорична дека дури нема да преговара за можноста Меси да го напушти клубот, иако тоа е токму желбата на самиот играч.
Бартомеу бил доста цврст во својата позиција, велејќи дека Лео е клучна фигура во плановите на новиот тренер Роналд Куман. Тој дури рече дека е подготвен да понуди нов 2-годишен договор на 33-годишниот Аргентинец.
Сепак, Меси сака да го напушти „Камп Ноу“. Ја изгубил довербата во Бартомеу и сака да бара нов предизвик. Неговата желба е да го раскине договорот со Каталонците, искористувајќи ја клаузулата во него.
Средбата меѓу двете страни траеше повеќе од час и половина, но без вистински резултат.
Каталонскиот шеф пристигна на состанокот со менаџерот Хавиер Бордас, додека на другата страна од масата, покрај таткото на Меси, беа и неговиот брат Родриго и адвокатот Хорхе Пекур.
Разговорите се очекува да продолжат утре во надеж дека ќе се постигне компромис.