Помалку од шест отсто од Французите се заразени со корона вирусот, ниво што е многу недоволно за да се избегне втор епидемиски бран, ако се укинат сите мерки по 11 мај. Тоа се проценки објавени во студија на Институтот Пастер, јави дописникот на МИА.
-За колективниот имунитет да биде доволен за да се избегне втор бран, ќе бидат потребни 70 отсто од луѓето со имунитет. Ние сме многу далеку, објаснува главниот автор на студијата, Симон Каучемез.
Како резултат на тоа, „по излегувањето од ограничувачките мерки, ако сакаме да избегнеме втор голем бран, мора да бидат зачувани мерките“, додава тој.
Изгледите за враќање на епидемијата ќе принудат на многу постепено подигање на ограничувачките мерки по 11 мај, предупреди вчера премиерот Едуар Филип, според кого Французите „нема веднаш и веројатно долго време да го пронајдат нивниот живот од порано“.
Студијата е направена од Институтот Пастер во соработка со јавната здравствена агенција Франс и Инсерм, и се заснова на математички и статистички модели. Овие алатки овозможуваат вкрстување на податоци за смртни случаи и за веројатност да умре кога некој е заразен, за да се добие проценка на уделот на заразената популација (5,7 отсто).
Генералниот директор за здравство, Жером Саломон, исто така, потсети дека „колективниот имунитет е слаб и дека се очекува да има повеќе од 90 отсто негативни тестови, бидејќи вирусот малку циркулира.
-Интервалот на неизвесност е важен, помеѓу 3 и 10 отсто. Но, без разлика дали е 6 отсто, 10 отсто или дури 20 отсто, тоа навистина не ја менува природата на проблемот, а тоа е дека во секој случај, ќе бидеме далеку од 70 отсто кој ни е потребен за да можеме да излеземе од ограничувачките мерки без проблеми, забележува Симон Каучемез.
Малиот удел на заразената популација се должи на самите ограничувачки мерки, се забележува во студијата, според која „просечниот број на заразени со еден случај паднал од 3,3 пред мерките на 0,5 за време на мерките. Целта на овие мерки, преземени од многу земји, беше пред се да се спречи масовен прилив на пациенти во исто време, што ќе ги надмине можностите на болничкиот систем.
Покрај тоа, студијата проценува дека 0,5 отсто од заразените умираат.
-Тоа варира во зависност од возраста и полот. Мажите имаат поголема веројатност да умрат кога се заразени од жените (тие имаат 50 отсто поголем ризик од жените) и оваа разлика се зголемува со возраста, вели Симон Каучемез.
Така, стапката на смртност е 13 отсто кај мажи над 80 години. Конечно, овие студии покажуваат дека ризикот од хоспитализација е 2,6 отсто кај луѓето кои биле заразени. Овој процент нагло се зголемува со возраста, достигнувајќи 31 отсто кај мажите постари од 80 години.