Портпаролот на СДСМ, Костадин Костадинов на прашањето на „Фокус“ дали според денешната изјава на министерот Манчевски, СДСМ оправдува вработување на свои партиски кадри, бидејќи во време на власта на ВМРО-ДПМНЕ тие биле дискриминирани, вели дека масовната партизација била одлика на владеењето на ВМРО-ДПМНЕ.
-Мислам дека министерот беше многу јасен, не би сакал ниту пак има нешто да го добјаснувам. Било какви споредби со времето на ВМРО-ДПМНЕ мислам дека не се соодветни. Масовна партизација на институциите беше одлика на криминалното владеење на ВМРО ДПМНЕ, сега вработување се законски, транспарентни и за сите важат исти услови. Таквиот однос кон државните институции и администрацијата заврши со заминување на ВМРО-ДПМНЕ во опозиција. Денес процесите за вработувања се законски, јавни и транспарентни . Сите вработувања се согласно план, потреба и програма на самата институција, а за сите кандидати важат еднакви услови и критериуми. Секој има еднакви можности за работа и за вработување, тврди Костадинов.
Министерот Дамјан Манчевски на денешното новинарско прашање за непотизмот на власта, прашално одговори: По 10 години дискриминација, кога ниеден член на СДСМ не можеше да се вработи во јавната администрација, каде сега да одат членовите и симпатизерите на СДСМ? Потоа додаде дека сега има Антикорупциска комисија и сето она за што се смета дека е проблематично, треба да се поднесе претставка.
К.С.