Кумановци и жители на соседните села, пред сè Табановце и Романовце, се жалат дека извесен период немаат железнички превоз кон Скопје иако имаат купено месечни билети, а информацијата денеска ја потврдија и од ЖРСМ Транспорт АД-Скопје. Од таму кусо информираа дека проблемот е поради недостиг на машиновозачи и најавија решавање на проблемот од август, годинава.
Од македонски железници во кусото соопштение информираат дека линијата Скопје – Табановце – Скопје е во прекин.
– Линијата Скопје – Табановце е во прекин од 23.06.2022 година поради недостаток на машиновозачи. Правиме напори линијата Скопје – Табановце – Скопје да се нормализира во август 2022 година, кусо информираа од ЖРСМ Транспорт АД – Скопје.
Кумановци и жителите на селата кои патуваат за Скопје укажуваат дека имаат купено месечни билети и дека ќе бараат поврат на средствата. Тие бараат побрзо решавање на проблемот, бидејќи цената на дневниот билет и повратна карта со воз е поевтина од цената за превоз со автобус.