Богатите земји не треба да нарачуваат дополнителни дози на вакцини за нивната вакцинирана популација, додека другите земји сè уште немаат примено вакцини против Ковид-19, објави денеска Светската здравствена организација (СЗО).
Шефот на СЗО, Тедрос Аданом Гебрејезус рече дека бројот на жртвите во пандемијата на коронавирусот повторно се зголемува, варијантата Делта станува доминантна и многу земји сè уште немаат добиено доволно дози на вакцини за да ги заштитат своите здравствени работници.
– Варијантата Делта се шири низ светот со застрашувачка брзина, што доведува до нов пораст на инфекции со Ковид-19 и смртни случаи, рече Тедрос, истакнувајќи дека е многу заразна варијанта, најнапред откриена во Индија, а сега во повеќе од 104 земји.
Тој смета дека глобалниот јаз во снабдувањето со вакцини е крајно „нерамномерен и неправеден“.
– Некои земји и региони всушност нарачуваат милиони дополнителни дози пред другите земји да обезбедат за да ги вакцинираат своите здравствени работници и најранливите, предупреди Тедрос.
Тој ги издвои производителите на вакцини „Фајзер“ и „Модерна“ како компании кои имаат за цел да обезбедат дополнителни вакцини на земјите кои веќе имаат висока стапка на вакцинација.
– Наместо тоа, тие треба да ги пренасочат своите дози кон Ковакс програмата за дистрибуција за распределба на вакцините за сиромашните земји, рече Тедрос.
Глаvната научничка од СЗО, Соум Сваминатан изјави дека светското здравствено тело засега не видело докази дека дополнителни дози од вакцините им се потребни на оние кои се потполно вакцинирани.
-Иако дополнителни дози од вакцините може некогаш ќе бидат потребни, нема докази дека веќе се потребни. Тоа мора да се темели на наука и податоци, а не на поединечни компании кои тврдат дека од нивните вакцини треба да се дава дополнителна доза, изјави Сваминатам.
Мајк Рајан, шеф на СЗО за вонередни ситуации предупреди дека ќе гледаме наназад со бес и срам ако некои земји почнат да користат драгоцени дози за довакцинација, додека истовремено други луѓе се уште умираат без вакцини.
-Тоа се луѓе кои сакаат да го добијат својот колач и да го изедат и потоа сакаат да направат уште малку колач и да го изедат, рече Рајан.
„Фајзер“ и нејзиниот германски партнер „Бионтек“ минатата недела најавија дека ќе побараат одобрување од европските и американските регулатори за вакцинација за трета доза што ќе го зајакне имунитетот шест месеци по вакцинацијата. Произведувачите уште во јавноста не ги дале на увид податоците на кои го темелат ова барање, но најавија дека тоа ќе го направат наскоро.