Текстот е објавен на 15 декември 2022 година во неделникот „Фокус“ во бројот 1.419.
Лидерот на ГРОМ и градоначалник на Карпош, Стевчо Јакимовски, деновиве е актуелен во јавноста, испорачувајќи критики кон власта, но и кон поранешниот коалициски партнер ВМРО-ДПМНЕ. Во интервју за неделникот „Фокус“ пред половина година, тој говореше за причините за раскинувањето на десетгодишната соработка со ВМРО-ДПМНЕ, за состојбите со јавниот превоз во Скопје и со урбанизмот во Карпош. Како што велеше Јакимовски, засилениот меѓународен интерес во земјава е во функција на уставните измени согласно француско-бугарскиот договор, кој, според него, треба да се поништи и да се бараат алтернативни решенија.
Разговараше: Влатко СТОЈАНОВСКИ
ФОКУС: Приватните превозници протестираа и го блокираа Скопје. Власта ги повикуваше Арсовска и ВМРО да ја тргнат блокадата, додека опозицијата бараше проблемот да го реши тајна коалиција меѓу Арсовска, владата, а тука ве спомнуваат и Вас… Каде лежи проблемот и одговорноста?
ЈАКИМОВСКИ: Ајде да се прашаме сите – дали сме задоволни од градските јавни претпријатија, од хигиената, од одржувањето на зеленилото, од јавниот превоз, па дури и од водоснабдувањето? И, ако сега некој се обидува да направи реформи во јавните претпријатија, нормално ќе има отпор. Наместо ние, како граѓани и јавност да ги поддржиме тие реформи во интерес на зголемување на ефикасноста, а намалување на трошоците, има отпор, кој нормално ќе оди кон создавање хаос.
ФОКУС: Има ли опасност главниот град да остане без јавен превоз?
ЈАКИМОВСКИ: Ако Градот има јавно претпријатие со автобуси што лежат во депо, нели тоа е срамота? Зошто мора да плаќа трошоци на приватни превозници ако има свои автобуси? Не знам дали им се должи, но ако е така, треба да им се исплати.
ФОКУС: Колку што е познато, долгот никој не го негира, туку се чека ревизија да се утврди висината и дали се издржани основите.
ЈАКИМОВСКИ: Нема страшно во тоа. Да се споредат картичките меѓу приватните превозници и ЈСП и потоа, ако има долг, треба да се расчисти и да се оди понатаму.
Истото се однесува и на Комунална хигиена, на Водовод и канализација, на Паркови и зеленило. Има ли смисла тие претпријатија да бројат над 1.000 вработени, а само 200 души да бидат непосредни извршители и сѐ друго да биде логистика и администрација?
Има ли логика „Водовод“ да нема водоводџија, па инсталациите да ги поставува приватна компанија наместо јавното градско претпријатие?
Нам ни требаат метлачи, тие што ќе собираат Ѓубре. Во кампањата говорев дека сакам да ги ставам контејнерите под земја и сакав да почнам реализација на тој проект, но од „Комунална хигиена“ ме информираа дека немаат возила за да ги подигаат подземните контејнери.
ФОКУС: Дали можеби проблемот е што овие реформи за кои говорите не се комуницираат доволно со јавноста? Да не се сведе реформата на замена на неподобни со подобни кадри?
ЈАКИМОВСКИ: Не на замена на кадарот, туку на намалување на трошоците, на зголемување на ефикасноста и на бројот на извршители во процесот на нивната основна дејност.
Каков пораз е кога директорот на „Паркови и зеленило“ ќе ви каже дека во Општина Карпош има само 5 лица што работат на одржување на зеленилото, а ние како локална самоуправа секоја година даваме околу 600 илјади евра за зеленилото и хигиената.
ФОКУС: Дали сметате дека состојбите со јавниот превоз ќе се подобрат со раскинување на договорите со постоечките приватни превозници и има ли вистина во тврдењето на опозицијата дека се прави простор за влез на превозник од странство?
ЈАКИМОВСКИ: Врска нема. Прво, на сите главна тема ни беше загадувањето, па исто ли е ако автобусите бидат еуро 4, 5 или 6? Или ќе се возат еуро 3 автобуси. Нормално е да тежнееме кон автобуси со повисоки еколошки стандарди, според мене само еуро 5 и 6, а најголем дел од автобусите ни се еуро 3. Претпоставувам дека објавените конкурси се со еуро 4 и 5, што влијае и врз активната и пасивната безбедност на патниците.
ФОКУС: Кога овие протести малку ескалираа, од власта се најавуваше и отстранување на блокадата како можно решение. Како тоа да се протолкува, ако се знае дека оваа структура дојде на власт, меѓу другото, и на бранот на протести?
ЈАКИМОВСКИ: Јас би предложил малку помирна да си биде владата, бидејќи тие на власт дојдоа со штрајкови и со блокади. Се сеќавате вие каде беа паркирани шаторите? Сега нека не ги нервираат протести, зашто така дојдоа на власт.
МАЖ РЕКОЛ, МАЖ ОДРЕКОЛ
ФОКУС: Дали сте дел од некаква тајна или каква било коалиција со Арсовска и со владата?
ЈАКИМОВСКИ: Како мисли Христијан Мицкоски – ќе се раскара со сите и тие со кои тој се раскарал ќе земат бензин, ќе се полијат и ќе се запалат, како да не постојат, за тој да биде среќен? Нормално дека ќе се бара соработка со секој што сака да даде поддршка за функционирање на Градот Скопје и општината. И нема тука ништо тајно, гласањата се јавни.
Јас немам коалиција со никого. Имам 2 советника од ГРОМ, кои сигурно ме поддржуваат, а со другите, од точка до точка на дневен ред, разговараме, преговараме, се договараме итн.
ФОКУС: Работи ли Советот на Карпош ефикасно и како успевате да обезбедите мнозинство со само двајца сигурни советници?
ЈАКИМОВСКИ: Освен за дел од урбанистичките планови за кои има натегање и не е на висина на потребите на граѓаните, за друго немало некој посебен проблем.
На пример, двапати ставам точка на дневен ред за граѓаните што живеат во непосредна близина на Сити мол, чие паркирање е загрозено од несовесни граѓани од надвор, зашто не ги паркираат возилата во Сити Мол и ги оставаат надвор. Одлучивме да им плаќаме слободни карти за да може да паркираат внатре во Сити мол, но советот на двапати со тесно мнозинство одби да им се плаќа.
ФОКУС: Како оди соработката со Арсовска во Град Скопје? Ваш кадар е директор на едно јавно претпријатие…
ЈАКИМОВСКИ: За „Градски паркинг“ е договорено да раководи претставник на ГРОМ. Тоа беше договарано уште со Мицкоски, но по принципот – маж рекол, маж одрекол, се пишмани. И една од причините за раскинување коалиција е непочитување на коалициските договори и манипулациите и лагите. А мене лаги и неискреност ми пречат. Подобро со некој да се искарам, отколку да има лаги и подлости.
ФОКУС: Како дојде до пресврт во односите меѓу вас и Арсовска, со оглед на тоа што не така одамна не можевте да ја добиете, па до неа јавно се обраќавте преку Фејсбук?
ЈАКИМОВСКИ: Со Арсовска имам добра соработка. Ако сум интервенирал до градоначалничката, ако сум праќал пораки и нема фидбек, што друго ми преостанува за да ја алармирам јавноста? Јас и Арсовска не сме биле во конфликт, комисиите во делот за урбанизмот не биле формирани, не само за Општина Карпош, туку за цело Скопје. И не само јас, трпеле сите општини за носење одлуки за урбанистички планови.
ФОКУС: Вашата реакција тогаш се однесуваше за план што предвидуваше „Пуцко Петрол“ да гради бензиска кај салата „Борис Трајковски“. Но, овој план беше поништен, па додека општината носеше нов, компанијата судски побаруваше милионска отштета. Како заврши ова?
ЈАКИМОВСКИ: Ние ќе чекавме, но бевме врзани со рок, зашто моравме да го фатиме последното рочиште, и за жал, не го фативме. Ние имавме жалба на апелација, баравме јавна седница и не беше дозволено, па минатиот месец е донесена пресуда Општина Карпош да плати отштета на „Пуцко Петрол“ од 110 милиони денари плус 6 милиони трошоци.
Таа пресуда ја обжаливме и до Врховниот суд со барање заштита на законитоста, со аргументација дека дел од нашите докази не биле земени во предвид од двата пониски суда. Имам чувство дека купувачот на земјиштето повеќе желба има да ги земе парите отколку да гради бензиска пумпа.
ИМАЛО ГРЕШКИ, НО ТИЕ НЕ СЕ ГОЛЕМИ
ФОКУС: Самиот споменавте дека најголеми проблеми во општинскиот Совет се јавуваат при носењето урбанистички планови. Неколку планови беа укинати од Уставниот суд, па кога може да се очекува повторно да бидат донесени?
ЈАКИМОВСКИ: Урбанистичките планови се соборени на Уставен суд благодарение на допис од претходниот претседавач на Советот на Карпош, кој изнел невистини. Наместо да го достават писмото и одговорот од раководителот на Секторот за урбанизам, претседателот на Советот неовластено предлага да бидат укинати плановите. Од денешна дистанца, од Уставен суд велат дека, кога би го имале писанието од раководителот на секторот, не би ги поништиле тие планови.
ФОКУС: Кој бил мотивот да се постапи така?
ЈАКИМОВСКИ: Причината за поништувањето беше политичка и беше увертира во пресметката со мене, која требаше допрва да се случи во една мегаломанска операција, во која прво се уриваат плановите, па потоа се кажува дека наводно има криминали во Карпош, за секоја активност преземена кон мене, вклучувајќи и мое апсење, да биде оправдана во јавноста. Таа операција, за жал, е премногу исполитизирана.
Искрен да бидам, како човек сум подготвен да издржам сѐ, и добро и лошо. Впрочем, граѓаните нѐ избираат на овие места за да ни аплаудираат на заслугите, но во исто време, ако имаме грешка, да нѐ казнуваат и да сносиме последици.
Јас, како градоначалник, веќе во четврти мандат можам да кажам дека имало грешки, но тие не се големи и одговорно тврдам дека Карпош била водечка општина во ефикасноста на работењето, почитувањето на законските прописи и со нулта толеранција на криминал и корупција.
ФОКУС: Може ли да кажете кога ќе биде донесен планот за Алумина, каде што со стариот план се предвидуваат голем број високи објекти?
ЈАКИМОВСКИ: Веднаш по моето доаѓање минатата година побарав од Секторот за урбанизам на советниците да им бидат презентирани сите урбанистички планови во изработка и во подготовка. Советниците за првпат се запознаени уште пред појавувањето на плановите во анкета и даваа свое мислење.
Но, во одредени моменти сум поразен. И покрај сите мои добри намери да разговараме, не сум добил никаков одговор од советничките групи. Едноставно, чекаат што било да се појави на урбанистичката сцена, за да го дочекаат на нож.
Но, јас сум дојден да ги решавам проблемите, а меѓу нив е немање урбанистички планови, особено таму каде што има индивидуално домување, а луѓето не можат да доградат, надградат…
ФОКУС: Но, за тоа никој не спори, реакциите се во однос на висококатниците, и затоа во фокусот беа неколку планови – кај „Борис Трајковски“, Алумина, Влае…
ЈАКИМОВСКИ: Во Влае истата зграда е цртана неколкупати од 2000 година наваму и никогаш немало проблеми, проблемот е Христијан Мицкоски, кој живее на стотина метри од тој објект. Од само нему разбирливи причини, нему таму му пречеше.
ФОКУС: Зошто?
ЈАКИМОВСКИ: Киното Влае и сите објекти околу него беше првиот трговски центар во Македонија изграден во 1964 година. Кај поранешната самопослуга имаше ресторан во изминатите 15 години и Христијан разбрал дека тука ќе се прават свадби, па инсистираше да нема ресторан. Добро, сопственикот се откажа од таа идеја.
Па, требаше „Тинекс“ да се прави во интерес на снабдување на граѓаните, но Христијан сметал дека нема да може лесно да оди до дома од паркирани возила. И од таа идеја се откажа сопственикот.
Очигледно, и станбена зграда му пречи. Јас не знам како се осмелува да се прави газда на нешто што не е негово, а во исто време гледаме дека парите што ги има од централите не ги искористи евентуално да го купи овој имот, па што сака нека прави со него.
Да бидеме сите заробеници на неговите желби е недозволиво и јас сум должен да застанам зад секој граѓанин што сметам дека е во право.
ДОБРО Е ШТО НЀ ТРПАТ И ШТО НЕ ЗЕМАТ ДА НЀ ИСПОТЕПААТ
ФОКУС: Неодамна споменавте дека многу бизнисмени – сопственици на локации тужеле или најавуваат тужби кон општината зашто се оневозможени да градат. Имате ли притисоци од ваков или од друг тип?
ЈАКИМОВСКИ: Да бидам искрен, добро е и што нѐ трпат и што не земат некое дрво да нѐ испотепаат. Да купите имот, да броите за него пари или, пак, вашето земјиште да ви биде вратено преку денационализација…
Ние, како локална самоуправа, треба да им кажеме што може, а што не може. Над нас е генералниот урбанистички план и ако тој некаде вели треба да има зеленило, мора да вцртаме зеленило. Ако ГУП-от вели овде ќе биде домување, тогаш мора да цртаме домување.
Е сега прашањето е колкави ќе бидат тие објекти.Јас сум поборник да не ги шириме, треба да се оди во висина, но никако да се зафаќаат огромни простори под изговорот дека ќе правиме мали објекти до 5-6 ката, ама ќе се рашириме на сите страни и ќе го уништиме зеленилото.
ФОКУС: Велите дека сте против широки објекти, но во ваше време беше изграден објектот „Настел“ во Тафталиџе, кој беше нарекуван бетонско чудовиште и стана симбол на таканаречената бетонизација. Го сметате ли за една од вашите грешки, што ги споменавте претходно?
ЈАКИМОВСКИ: Грешка е во нејзиниот архитектонски лик, во концепцијата на зградата, зашто бевме убедувани и требаше на еден интересен начин објектот да биде разигран. И во самиот објект требаше да има цели процепи за да струи воздухот, но очигледно инвеститорот, за да може да има што е можно повеќе квадрати и локацијата да му биде поисплатлива, освен два пасажи низ кој се поминува, нема ниту еден процеп.
ФОКУС: Како тогаш добил одобрение за градење со ваков проект, поинаков од оној што би бил презентиран?
ЈАКИМОВСКИ: Тој го добил одобрението онака како што го барал од нас и тука е пропустот на нашите служби.
Сепак ќе кажам дека критиките кон нас главно од политичките противници се предимензионирани. За моите 8 и пол години во Карпош се изградени вкупно 37 висококатници, а во Аеродром се изградени 150 за истиот период. Колку се изградени во Центар?
Спроти државна болница видете што се гради, комшиите може кафињата да си ги подаваат од балкони и нема реакции. Такви грдосии кај нас немаме.
ФОКУС: Од друга страна, велите треба да се оди во висина. Сега беше актуелен случајот со изградба на висококатница кај поликлиниката Букурешт, но велите дека не може да оди толку високо колку што предвидува ДУП-от.
ЈАКИМОВСКИ: Да, ќе ја правиме таа пониска, но доволно висока. Има згради од 14, 12, 20, 28 ката, но нејзината парцела не дозволува 28 ката, зашто ќе треба да одиме 8, 10 нивоа под земја за паркирање. И затоа тој објект не може да има 28 ката.
ЛУКРАТИВНИ ИНТЕРЕСИ
ФОКУС: Што ја прели чашата да ја раскинете коалицијата со Мицкоски, бидејќи до крај велевте дека ќе останете дел од коалицијата, од причина што премногу сте вложиле во неа…
ЈАКИМОВСКИ: Во таа коалиција имаме вложено 9 години и многу совесно и коректно јас и ГРОМ се однесувавме во сите тешки моменти за ВМРО-ДПМНЕ. И прогоните и затворите, па дури и грешки кога имаше ВМРО. Па, и кога сакаа да го менуваат Мицкоски, стоевме на негова страна зашто сметавме дека тој е официјален претседател и ние не може да соработуваме со која било неформална група надвор од раководството.
Наспроти тоа, Мицкоски се обиде кај нас во ГРОМ да направи преврат, со поддршка и стимулирање за евентуално ново раководство.
ФОКУС: Кои биле причините, со оглед дека останавте лојален партнер кога бевте и под прогон и кога, како што самиот изјавивте во една пригода, сте имале непристојни понуди од власта да ја смените страната?
ЈАКИМОВСКИ: Сите во државата знаат дека јас сум коректен соработник, но со мене не може да си поигрувате. Јас за другарството давам 3 и земам едно. Очигледно, на Мицкоски му одговараат сигурни соработници, за разлика од мене, кој смета дека пријателството и партнерството треба да се негуваат.
ФОКУС: Дали проблемот беше и тоа што на своја рака влеговте во трка за градоначалник на Карпош?
ЈАКИМОВСКИ: Мицкоски пред изборите се обиде да ми презентира лажни анкети, не знаејќи дека и јас во исто време правам анкети. И неговите прогнози беа дека нема да влезам во вториот круг и дека нема да земам повеќе од 2 и пол илјади гласови.
По изборите, неговата желба за промена во партијата се зголемила и дел од сценариото за откажување на јавното претпријатие за паркирање било со цел да се создаде револт во партијата и да дојде до ново раководство. И тоа му беше неуспешно.
Протестите што ги организираше во Влае, а зад тоа се кријат исклучиво лукративни причини, за мене беше крајно непристојно, како што беше и праќањето емисари од одредени бизнисмени да се бара финансиска кооперативност. И закани стигнуваа до одредени бизнисмени.
И кога за еден урбанистички план во делот на Злокуќани, каде што се наоѓа „бетоњерата“ не дозволија на дневен ред да се стави, тоа ја прели чашата, зашто граѓаните 30 години бараат да се тргне „бетоњерата“.
ФОКУС: Дел од обвинувањата на ваша сметка се дека некој ве стимулира на вакво однесување, па дали тоа е точно?
ЈАКИМОВСКИ: Слушам разни глупости и од него и од неговите мегафони дека нѐ плаќал некој друг, дека нѐ плаќал Никола Груевски од Будимпешта… Тој мисли дека ако него го плаќаат од Будимпешта и ако тој земаше пари од Будимпешта, дека сите ние земаме.
ФОКУС: Кој го плаќал од Будимпешта? Груевски?
ЈАКИМОВСКИ: Тој добро си знае. Не знам дали е Груевски. Ама дека бил финансиран од Будимпешта, бил финансиран. Веќе не е, зашто сега е на власт и веројатно може сам да се финансира. Но, тргнувајќи од своето искуство, смета дека може и други така да земаат пари. А тоа што е најбитно, мене пари за битка со Мицкоски не ми требаат. И не знам какви трошоци имам јас да се справам со Мицкоски, освен мојата реторика.
ФОКУС: Значи Мицкоски ве обвинил дека Груевски стои позади вас, така ли може да се разбере? Имате ли комуникација со Груевски?
ЈАКИМОВСКИ: Можеби тој директно не, но преку неговите мегафони. Во крајна линија, ви личам ли јас на некој што може некој да му наредува и да исполнува нечии барања и задачи?
Мицкоски да си останел на договореното и да бил партнер како што треба, да не лажел и манипулирал, да не се мешал во ГРОМ и да не изигрува шпицен-градоначалник, да не го ставал носот во секој урбанистички план, ние денеска би имале коалиција.
Инаку, јас со Груевски за целава оваа година, се слушнав во август и ништо повеќе. Чисто – како си, што правиш беше муабетот и не разговаравме за политика.
ЗАКАНИ ПРЕТОЧЕНИ ВО ЌОТЕК
ФОКУС: На каква финансиска кооперативност и на какви лукративни интереси на Мицкоски мислите?
ЈАКИМОВСКИ: Преку свои канали се обидувал да стигне до одредени бизнисмени со барање за финансиска кооперативност, па кога тие работи ќе бидат одбиени, потоа трпат закани. Очигледно методот на закана е секојдневие. А закана беше преточена и во ќотек на советник, што досега е незапаметено. И порано советници преминувале…
ФОКУС: Зборувате за советникот на ВМРО од Карпош што ја напушти советничката група…
ЈАКИМОВСКИ Да. Тој дејствува како независен, зашто не ги поддржува опструкциите на ВМРО-ДПМНЕ. Имаме сознанија дека со нападот врз него координирале луѓе од непосредното опкружување на Мицкоски и дека непосредното извршување било направено од луѓе блиски до неговото обезбедување, вработени во нивни фирми.
Но, гледате дека исто им се случи со советник во Град Скопје, ќе се случува и со други советници. Гледате опструира во Карпош, во Град Скопје, опструира и во парламентот…
ФОКУС: Очекувате ли да се отклони и некој пратеник во контекст на гласањето на уставните измени, што не може да се направи без поддршка на пратеници на ВМРО-ДПМНЕ?
ЈАКИМОВСКИ: Според моите сознанија од дипломатски извори, засега имале 6 сигурни пратеници, а им требаат 8. Кои се тие 6, не знам. Мојот инстинкт говори дека ова зачестено доаѓање на странски дипломати, гледате Штајнмаер колку беше среќен што е во Македонија, во Кавадарци, гледате доаѓаат истражители од САД, е во функција на уставните промени.
ФОКУС: Нели тимот за санкции од САД дојде да помогне во борбата против корупцијата и подобрувањето на состојбите во правосудството, а не за влијание врз пратеници?
ЈАКИМОВСКИ: Дел од причините сигурно се уставните промени. Знаете што? Ние имаме судски постапки што се политички мотивирани и затоа тие се неефикасни. Ако обвинителството и судот се остават да работат независно, сигурно секаде каде што ќе има обвинение, ќе заврши со пресуда. Таму каде што има политички нарачки, нормално нема да има ефикасност.
ФОКУС: И против вас имаше еден предмет во врска со изградба на општинска зграда, поднесено беше обвинение, па до каде е оваа постапка?
ЈАКИМОВСКИ: Предметот не е завршен, тој е во судска постапка. Се работи за две бараки, нема решение за поставување привремен објект, а, замислете, решението требало да го издадеме на самите себе.
ФОКУС: Сепак, петмина од 10 обвинети признаа вина.
ЈАКИМОВСКИ: Не е точно. И тие што признаа вина беа во други предмети, од причина што финансиските издатоци за судските рочишта се многу големи. Сметајте дека секое застапување од страна на адвокатите е 400 евра, а тој службеник зема толку плата, па како може да си дозволи да оди во судските лавиринти? Една од госпоѓите што призна вина од Карпош до судот дошла пеш, бидејќи немала средства ни за автобуски билет.
ПРЕМНОГУ СЕ ЗАКРВИВМЕ И СИ ИЗВАДИВМЕ ОЧИ
ФОКУС: Најавивте дека на следните избори ќе одите самостојно. Но, можно ли е да бидете дел од некаква поголема коалиција со Арсовска и со други субјекти и движења?
ЈАКИМОВСКИ: Ќе одиме самостојно и затоа да одиме со една изборна единица, без цензус, и кој колку гласови ќе си добие – толку. Досега не сме размислувале и разговарале за коалиција.
ФОКУС: Дали очекувате на следните избори да има два големи блока – проевропски блок на СДСМ со албанските партии и другиот на ВМРО и Левица?
ЈАКИМОВСКИ: Не знам кој каков план има, но затоа и за ВМРО е најдобро да има една изборна единица и повеќе партии да влезат во парламентот. Ако остане овој модел и ако ВМРО биде изолирано, а СДСМ направи коалиција со албанскиот блок, ВМРО ќе остане во опозиција. Сами да освојат над 60 пратеници е многу тешко.
ФОКУС: Неодамна рековте дека Мицкоски се гледа со Црвенковски. Која е целта на овие средби?
ЈАКИМОВСКИ: Зошто Мицкоски не го демантира тоа? Во неговата политика се чувствува здивот на Црвенковски, само што тој не е мајстор како Црвенковски да ги изведе тие процеси како него. Обидите за интриги, манипулации, својствени за Црвенковски, се чувствуваат и кај Мицкоски. Еден човек без искуство од асфалтот е многу провиден во таа работа и гледате настрадува. Го напуштаат луѓе, коалициски партнери…
ФОКУС: Кој е мотивот на Црвенковски за овие средби?
ЈАКИМОВСКИ: Имам впечаток дека тој е незадоволен од состојбите во СДСМ и на ваков начин се обидува да направи елегантен трансфер на власта во државата, а со тоа да го тргне од власт СДСМ. Не сум разубеден дека Црвенковски целосно се откажал од политичките аспирации.
ФОКУС: Какви ви се односите со Заев? Порано вие го обвинувавте дека ви барал 250.000 евра, неодамна тој се чудеше како жителите на Карпош можеле да гласаат за Вас…
ЈАКИМОВСКИ: Се случува Заев да има променливи изјави. Ние сме биле пријатели, по изборите се јави да ми честита, што сметам дека е многу коректно од него. Изјавата веројатно му била потребна за дневно-политичка актуелност и не ја земам за зло.
Како што гледате, сум решил на многу луѓе што ми згрешиле да им дадам пас за соработка, зашто во изминатите 15 години премногу се закрвивме и си извадивме очи, а граѓаните не го сакаат тоа.
Јас никого не сум мрднал во Општина Карпош, никому не сум му се реванширал, што покажува дека може да извршиме мирен трансфер во власта без да ги тормозиме службите. Најомразена работа е да им се одмаздуваш на потчинетите. Јас го одбрав патот на помирувањето.
ФОКУС: Дали имате комуникација со Ковачевски и со други функционери на СДСМ и власта?
ЈАКИМОВСКИ: Кога сум го побарал, Ковачевски секогаш ми кренал телефон. За овие 14 месеци имам 3 средби со него, разговараме за она што е интерес на граѓаните на Карпош. Андреј Петров е мој пријател, комуницираме со шефот на советничката група на СДСМ во Карпош, контактирам со министрите за транспорт и врски и труд и социјала согласно надлежностите, и тоа е.
Проблемот е на опозицијата што не прави линкови, туку ги кине линковите. Како да функционирам со скинатите линкови со опозицијата и со власта. Ако Мицкоски знае, сакам да одам на таков час.
ДА НЀ ГРЕЕ ОГНОТ, АМА ДА НЕ СЕ ИСПЕЧЕМЕ
ФОКУС: Дали стоите на ставот дека Преспанскиот договор е велепредавство?
ЈАКИМОВСКИ: Јас стојам на тој став и дека тој договор не требаше да се потпише. Често ги слушам нашите раководители дека немаме друга алтернатива, освен Европа и некни на лидерската средба ги прашав дали Европа има алтернатива за Балканот освен Балканот во Европа? Јас гарантирам дека и Европа нема алтернатива.
ФОКУС: Можно ли е концептот „Отворен Балкан“ да е алтернатива на ЕУ за регионот? Или, пак, европската политичка заедница промовирана од Макрон?
ЈАКИМОВСКИ: Сепак, тоа повторно е обид да се држиме блиску до нив, ама доволно далеку. Да нѐ грее огнот, ама да не се испечеме. Ако сакаме да правиме нешто самостојно, тогаш ќе имаме многу проблеми.
Мислам дека не требаше „главом без обзиром“ сѐ да дадеме само да сме членки на НАТО. Бев целосно во право кога кажав дека оваа територија му треба на НАТО за да биде затворено јужното крило. И војната во Украина го покажува тоа. Ние само требаше да издржиме и во НАТО ќе влезевме под привремената референца БЈРМ.
ФОКУС: Дали Преспанскиот договор го сметате за веќе завршена приказна или и вие ја оставате подотворена вратата за одредена интервенција?
ЈАКИМОВСКИ: Главниот проблем кај Преспанскиот договор е што е депониран во Обединетите нации. Зад него застанале големите сили, Метју Нимиц беше пратеник на ОН. Нека не го лаже народот некој, таков договор не може да се раскине, зашто ако го раскинете, ќе добиете санкции под покровителство на ОН. Да сме Русија, ќе издржиме санкции, но Македонија не може.
ФОКУС: И францускиот предлог беше спонзориран од меѓународната заедница, но велите дека Договорот со Бугарија, кој е во негова основа, треба да се поништи. Што ќе значи тоа за нашата европерспектива?
ЈАКИМОВСКИ: Има разлика, бидејќи француско-бугарскиот договор не е депониран во ОН. Предлог беше на Франција, но тој договор нам ни прави штета и затоа сметам дека треба да се раскине, па дури и нашата европска агенда да се стави на спореден колосек. Кога ќе имаат желба нас да нѐ примат во ЕУ да го забрзаме тој процес.
Дотогаш треба да бараме алтернативни решенија за подобар живот, зашто гледаме дека како што се доближуваме кон Европа, ние живееме сѐ посиромашно.
ФОКУС: На што поточно мислите?
ЈАКИМОВСКИ: За почеток, ајде да склучиме билатерален договор со Англија, која не е членка на ЕУ. Ајде да ги тргнеме визите со Катар, со Саудиска Арабија, со Либан и со други арапски земји, да видиме дали може да донесеме нивни инвестиции овде.
ФОКУС: Колку вакви алтернативи се одржливи, бидејќи евроатлантската интеграција можеби е единствената работа за која има консензус во државата поделена по етничка основа и по многу други линии?
ЈАКИМОВСКИ: Унитарна Македонија ќе се држи ако е економски развиена. Арапските емирати се 6 емирати, но гледате каква развиена држава е. Цел свет гравитира кон Дубаи и Абу Даби. Економскиот развој и повисокиот државен стандард е тој што ќе ја одржи унитарноста, а не ЕУ.
ФОКУС: Нели токму тоа е целта на ЕУ? Ако НАТО носи безбедност, ЕУ носи подобар живот.
ЈАКИМОВСКИ: Јас се чувствувам понебезбеден, зашто до влезот во НАТО Бугарија не атакуваше врз нашата историја, јазик и идентитет. Бугарските претставници не викаа дека Бугарија е од Варна до Охрид. Така што тоа кај мене предизвикува чувство на несигурност.
НЕ ДАЈ БОЖЕ ДА ДОЈДЕ ДО ТРЕТА СВЕТСКА ВОЈНА
ФОКУС: Сепак, многу експерти велат дека членството во НАТО има особена тежина по руската агресија во Украина, бидејќи сме под чадорот на колективната безбедност. Се согласувате ли?
ЈАКИМОВСКИ: Не дај Боже да дојде до трета светска војна, ништо нема да биде битно, ќе биде – снаоѓај се како знаеш. Ако ескалира конфликтот, членството во НАТО не ни менува многу, туку нѐ доведува во опасност да бидеме ракетирани од тие од спротивната страна.
ФОКУС: Како, според Вас, ќе се развива конфликтот во Украина? Можно ли е излезно вин-вин сценарио, како што заговара Ердоган?
ЈАКИМОВСКИ: Конфликтот ќе се реши со пораз на една од страните. Не може да нема поразени, Русија има земено 20 отсто од територијата на Украина. Ако загинале 100 и кусур илјади, ако има над 400 илјади ранети и инвалиди, нема вин-вин решение.
ФОКУС: Кој би бил исходот тогаш?
ЈАКИМОВСКИ: Мислам дека Русија нема да се задоволи само со територија, туку само со безбедносни гаранции дека Украина нема да стане членка на НАТО. Гледате како предизвика тектонски нарушувања изјавата на Меркел дека сугестијата на Украина да ги потпише двата мински договори било со цел да се добие на време за Украина да се подготви на војна.
Целта на Западот веројатно беше да се исцрпува Русија. Ако Украина стане членка на НАТО, уште подобро. Балистичките ракети на НАТО ќе беа поставени во Харков, само 500 километри од Москва. Но, кога веќе таа работа не испадна во мирнодопски услови, сега се оди на варијанта на исцрпување на Русија, но мислам таа работа не добива посакуван правец.
ФОКУС: Имаме една ситуација кога откажувањето на НАТО-амбициите на Украина веќе е понудено на маса, а од друга страна, Русија се мачи да ги задржи анексираните територии.
ЈАКИМОВСКИ: Интересно е што Русија се мачела и со руско-француската војна, се мачела и во двете светски војни и секогаш излегувала како победник. Она што е најинтересно, секогаш се повлекувала, се работело за тактично повлекување, кое на крај завршувало со победи. Не знам дали знаете дека во 1610 година, Полјаците имаат влезено до Москва и поставиле свој цар, кој владеел 2 години, за потоа Русите да влезат во Варшава.
ФОКУС: Значи, според Вас, ова ќе трае додека една од двете страни не победи?
ЈАКИМОВСКИ: Не сакам да бидам сфатен као русофил, само сум реален. Никој не може да ја запостави реалноста дека Украина се наоѓа во непосредна близина на Русија, која е светска суперсила.
Ако победи Русија, а оваа војна не е само војна меѓу Русија и Украина, цело оружје и обука ги дава НАТО, имаме нов светки поредок. Ако не победи, тогаш овој постоечкиот неолиберален ќе опстои и ќе добие уште повеќе на сила.
И ВМРО И СДСМ БЕА НЕРВОЗНИ ЗА ВРАБОТУВАЊЕТО НА МОЈОТ СИН
ФОКУС: Дали вработувањето на вашиот син во М-НАВ има политичка заднина?
JАКИМОВСКИ: Апсолутно дека нема. Тој работеше во „Градски паркинг“, замина еден ден пред да дојде директорот на предлог на ГРОМ. Си конкурираше на конкурсот и се вработи во М-НАВ. Нервозни беа и СДСМ и ВМРО.
ЌЕ ГИ ВИКНАТ НА 2-3 КОКТЕЛИ И МИСЛАТ ДЕКА СВЕТОТ СЕ ВРТИ ОКОЛУ НИВ!
ФОКУС: Двајца ваши пратеници од претходниот состав ги поддржаа уставните измени според Преспанскиот договор и се разидоа со Вас и ГРОМ, а сега истото ви се случи и со единствениот пратеник од овој состав. Дали потфрлувате со кадровската селекција?
ЈАКИМОВСКИ: За мене најбитно е партијата да не потфрли. Очигледно е дека кога некој ќе стане пратеник, кога ќе биде повикан на 2-3 коктели, на една вечера, кога ќе има 1-2 настапи со медиумско актуализирање, стануваат свесни дека многу вредат и дека цел свет се врти околу нив.
Но, и власта си има свои методи како одреден број луѓе да придобие во своја функција. Очигледно е дека во Македонија е многу тешко да имате принципиелна политика, да издржите до крај со ставот. Одредени луѓе се направени од лесно топлив материјал.
АКО УВЕЗУВАМЕ 500 МИЛИОНИ ЕВРА СТРУЈА, МАРЖАТА ЗА ТРГОВЦИТЕ Е 50 МИЛИОНИ?!
ФОКУС: Како владата се справи со економската и со енергетската криза?
ЈАКИМОВСКИ: Дали се доволно широки мерките е едно прашање, но мерките малку доцнеа, цели 8-9 месеци трпеше штета стопанството. Ако пропаднат фирмите, што ќе правиме, кај ќе работат луѓето, кој ќе плаќа даноци во администрацијата?
Владата требаше да го укине слободниот пазар на електричната енергија, да ги тргне приватните оператори и единствен увозник да биде АД ЕСМ (ЕЛЕМ). И, ако должиме кон ЕЛЕМ, може да ни биде наплатено кога ќе имаме пари.
Ако увезуваме 500 милиони евра електрична енергија, 10 отсто се 50 милиони евра маржа. Со тие пари за две и пол години ќе ја направиме хидроцентралата Бошков мост, која чини 120 милиони евра. Подобро таа маржа да останеше во ЕЛЕМ, отколку да ги богатиме приватните оператори.