Белоруски суд вчера изрече долги затворски казни за неколку критичари на режимот на претседателот Александар Лукашенко, меѓу кои и сопругот на опозициската лидерка Светлана Тихановскаја.
Сергеј Тихановски, кој е во притвор околу 1,5 година, осуден е на 18 години затвор поради организирање на антивладини протести, поттикнување социјално непријателство, попречување на работата на Централната изборна комисија и организирање акции со што бил нарушен јавниот ред.
Сергеј Тихановски е познат видео блогер, кој се кандидираше за претседател, но беше уапсен под сомнителни обвиненија и ставен во затвор. На негово место беше номинирана неговата сопруга Светлана Тихановскаја, која го освои второто место на претседателските избори. Опозицијата одби да ги признае резултатите и организираше протести, кои во некои случаи прераснаа во немири.
Вчера беа изречени драконски пресуди и за други опозиционери. Меѓу нив е уште еден видео блогер, Ихар Лосик, кој е осуден на 15 години затвор. Четворица други обвинети се осудени на затворски казни од 14 до 16 години.
Тие беа уапсени пред контроверзните претседателски избори одржани во август 2020 година.
Авторитарниот владетел Александар Лукашенко тврди дека на тие избори го добил шестиот мандат на власт и покрај широко распространетото верување дека гласовите биле наместени, што доведе до масовни протести.
