Повеќе од 75 лица загинаа при експлозија на цистерна со гориво на Хаити, изјави претставникот на Министерството за здравство на таа земја, Лоре Адриен.
Претходно премиерот на Хаити, Ариел Анри прогласи тридневна жалост „во спомен на жртвите од трагедијата што ја потресе целата нација“.
– Бев очаен кога ја слушнав тажната вест за експлозијата. Многу луѓе загинаа, а причинета е и голема материјална штета, изјави Анри.
Според првичните информации, цистерната се обидувала да избегне мотоцикл што доаѓал од спротивната страна, по што се превртела.
Карипската земја страда од голем недостиг на гориво, бидејќи синџирот на снабдување е делумно во рацете на банди. Хаити е во тешка криза по атентатот врз претседателот Жовенел Моиз, извршен на 7 јули годинава, и по земјотресот со интензитет од 7,2 степена по Рихтер неколку недели подоцна, во кој загинаа повеќе од 2.200 луѓе, а беа уништени десетици илјади домови.
Во земјата со 11 милиони жители, во последно време зачестија и киднапирањата од банди.
