ДЗР констатираше низа неправилности во работењето на Агенцијата за филм. Наместо одговорност, раководството на Агенцијата влезе во војна со најуспешниот македонски режисер Милчо Манчевски, кој вели дека тоа е класичен прогон на укажувач. Во меѓувреме, Агецијата за филм секоја година му дава по 120.000 евра на едно граѓанско здружение.
Пишува: Катерина СМИЛЕВА БОЖИНОВСКА
Агенцијата за филм на 16-ти мај годинава објави дека поднела кривична пријава против продукцијата „Банана филм“ на режисерот Милчо Манчевски. Агенцијата се повикува на извршениот инспекциски надзор од Министерството за култура за проектите „Мајки“и ‘„Врба“ и вели дека овластениот инспектор доставил информација и докази со предлог за проверка и постапување по истите проекти до Управата за финансиска полиција.
Лично режисерот Манчевски смета дека кривичната пријава против неговата продукција е политички прогон поради укажување на корупција. Тој во изјава за „Фокус“ објаснува дека уште во 2020 ги пријавил луѓето од Агенцијата за филм за незаконито работење и конфликт на интереси. Антикорупциска комисија и Транспаренси интернешнл го потврдиле тоа, побарале разрешување на тогашниот директор Горјан Тозија и поднеле кривична против него. Владата не го разрешила, но по завршување на мандатот, истиот не му беше продолжен.
Сепак, и по него, вели Манчевски, праксата на корупција и местени конкурси во Агенцијата продолжила, како и фаворизирање на некои членови од раководството на Друштвото на филмски работници (ДФРМ) за сметка на квалитетни филмаџии.
„Тука не им е важно кој какви резултати постигнува со досегашните филмови, туку партиски и семејни врски. Јас повторно го пријавив незаконското работење. Државниот завод за ревизија и Транспаренси ги потврдија моите забелешки, а на случајот работи и Антикорупциска. Сегашната хајка во нивните медиуми е одмазда со класичен прогон на укажувач на корупција заради замолчување – што е кршење на закон. Тој прогон има и делумна политичка поддршка, што е уште поголемо кршење на закон. Групичката околу раководството на АФ и ДФРМ измисли незаконитости во мојата фирма, „Банана филм“ и прати инспекција“, вели најнаградуваниот македонски режисер.
Тој додава дека откако Инспекцијата не утврдила неправилности, „групичката“ се нашла во небрано бидејќи не им поминал политичкиот притисок и решила да лаже дека сепак нешто нашле. Манчевски најавува поднесување четири кривични пријави.
„И Министерството за култура потврди дека лажат. Тие сепак продолжија со тоа што беа наумиле и поднесоа кривична пријава за да ме замолчат и за да имаат повеќе пари за делење. Со случајов на политички прогон поради укажување на корупција е запознаено и ресорното министерство и политичкиот врв, ама решение не видовме. Се заинтересираа и странските амбасади. Мојот правен тим подготви четири кривични пријави. Работи на уште неколку, како и на тужби. Ако ваков прогон и плукање е цената на тоа да се работи во Македонија, тогаш нека биде така. И покрај сè – искрено сакам да верувам дека институциите можат да му служат на граѓанинот во Македонија. Алтернативата е хаос и апатија“, заклучува режисерот.
ЦЕЛИОТ ТЕКСТ МОЖЕ ДА ГО ПРОЧИТАТЕ ВО НАЈНОВИОТ БРОЈ ОД НЕДЕЛНИКОТ “ФОКУС” КОЈ ШТО МОЖЕТЕ ДА ГО КУПИТЕ И ВО ЕЛЕКТРОНСКА ФОРМА НА ОВОЈ ЛИНК