Кавадаречкиот градоначалник Митко Јанчев ја поднови својата сопруга Веселка со нов автомобил од марката Range Rover. Возилото со бела боја кое пристигнало на нивната адреса ја изненадило Јанчева, со која градоначалникот е заедно од рана младост.
За „Фокус” тој вели дека секоја жена заслужува љубов и почит од страна на својот сопруг, бидејќи според него жената е столб на семејството.
-Со сопругата сме заедно 25 години и таа секогаш стоела покрај мене, во добро и во лошо. Родители сме на три деца, заедно ги воспитуваме на вистинските вредности, а семејството за нас не би рекол дека е приоритет, туку дека е се!
Новиот автомобил кој и го подарив на сопругата е само гест на внимание, на благодарност за сето она кое таа значи за мене и за нашето семејство, за нејзината пожртвуваност. Растен сум во фамилија каде семејните вредности се светост, ја продолжуваме таа традиција- вели градоначалникот.
Додава дека не е важен подарокот, туку вниманието пред се, и за него мажите кои си ги почитуваат своите сопруги и кои ја покажуваат својата љубов кон нив, се луѓе во вистинскиот смисол на зборот.
-Жената е таа која од куќата прави дом, која ја дава таа топлина помеѓу ѕидовите, која пожртвувано се грижи за децата, за целата организација на едно семејство. Со сопругата заедно минавме многу години, добри и тешки моменти, како што впрочем се случува во сечиј живот, овој подарок е само еден начин да и покажам колку ми значи нејзината поддршка и посветеност – изјави Јанчев.
Во 2017 година, кога тој беше кандидат за градоначалник, пред изборите, на сопругата исто така и подари автомобил, а тогаш низ градот се прошири веста дека истиот изнесувал 260.000 евра.
Тогаш во разговор за ,,Фокус” тој откри дека на сопругата и подарил автомобил од марката Ауди ТТ, а не Порше, како што се шпекулираше, по повод раѓањето на нивното трето дете, ќерката Мила, но истиот изнесувал 28.000 евра.
-Не се вистинити шпекулациите дека автомобилот изнесува 260.000 евра, но кога би можел, би одвоил и таква сума за автомобил за сопругата- ни изјави градоначалникот во 2017 година.
Новиот автомобил, кој денес и го подарил на сопругата изнесувал 240.000 евра.
Инаку, во градот тој и неговата сопруга важат за доста стабилен пар, и познати се по својата хуманост, како иницијатори и учесници во низа на хуманитарни акции и настани.
Вики Клинчарова