Автомобил кој се поврзуваше со вицепремиерот Артан Груби ноќеска околу 3.30 часот беше запален во скопски Чаир. Според објавата на Груби, Аудито кое беше запалено било на негов пријател, а нападот бил насочен кон вицепремиерот.
-Им се извинувам на сите мои соседи во мојата населба за големото вознемирување синоќа пред нашата зграда само поради мојата професија. Исто така, му се извинувам на мојот пријател и неговото семејство за предизвиканата штета само поради мојата професија. Во политиката сум за да служам и да оставам трага со работа и дела, а не да ми се тероризира семејството, соседите и пријателите, напиша Груби денеска.
Но, албанските медиуми кои први ја објавија веста за запалениот автомобил, возилото го поврзаа со Груби, иако и од МВР иницијалите на сопственикот на Аудито се различни од оние на вицепремиерот.
Се поставува прашањето кој е вистинскиот сопственик на возилото и зошто во текот на ноќта било паркирано пред станот на Груби доколку не е негово.
Во анкетниот лист на десната рака на Али Ахмети нема пријавено возило Ауди. Според анкетниот лист, возниот парк на Груби е само еден автомобил Цитроен Ксара, стар 22 години и со вредност од 1.000 евра.
К.С.Б.
ФОТО: ТВ 21