Текстот е објавен на 17 ноември 2022 година во неделникот „Фокус“ во бројот 1.415.
Поранешниот пратеник на БЕСА Кастриот Реџепи, кој делува како независен откако реши да ја спаси оваа влада на СДСМ и ДУИ после локалните избори, кога се обиде да ја урне ВМРО-ДПМНЕ заедно со Алијанса, Беса, Алтернатива и Левица, сега најави дека ќе се приклучи на новата партија што ја најави Изет Меџити. Во интервју за „Фокус“ направено пред нецела година, Реџепи вели дека времето покажало оти донел правилна одлука, бидејќи, како што истакнува, го одржал во живот интеграцискиот процес. Врз основа на неговиот пример да постапи по сопствено убедување и спротивно на партиската одлука, тој изрази увереност дека доволно пратеници на ВМРО-ДПМНЕ ќе гласаат за промена на Уставот, за да се отворат преговарачките поглавја со ЕУ.
Разговарал: Влатко СТОЈАНОВСКИ
ФОКУС: Помина една година од иницијативата за изгласување на недоверба на владата на СДСМ и ДУИ, која пропадна поради Вас, бидејќи не се појавите на собраниската седница. Од денешна перспектива, како гледате на тие настани?
РЕЏЕПИ: Убеден сум дека направив точен и добар потег, со тоа што ја искористив можноста и уставното право да гласам по сопствено убедување и да дадам придонес кон продолжување на интеграцискиот процес на државата, правецот и курсот што беше заземен за интеграцијата кон ЕУ после интегрирањето во НАТО.
Не можев да дозволам да се формира една можна коалиција која беше во магла, бидејќи имаше многу партии во меѓусебна контрадикција. Така што тоа повеќе беше едно здружување за чисто преземање на власта, без да се има визија, што ќе ја ставеше во нејасна иднина и државата и граѓаните.
ФОКУС: Нели бевте свесен за тоа кога го стававте потписот на списокот со 61 пратеник? Како се предомисливте?
РЕЏЕПИ: Потпишувавме бланко на 4 листа, процесот беше брзо инцииран од колеги од партијата. Барав објаснување од претседателот Биљал Касами и секретарот во тоа време Аријанит Хоџа зошто се смени курсот на партијата преку ноќ. Тогаш дојде потпретседателот на ВМРО-ДПМНЕ Александар Николоски и немаше време да се дебатира.
Уште повеќе, не сакав да ги ставам во незгодна ситуација сопартијците и да се покаже пред ВМРО-ДПМНЕ дека не сме се координирале и усогласиле. И така го ставив потписот, но после тоа имаше процес на дискусии со колегите од Беса. Кога видов дека веќе беа слепо ориентирани од нејасни причини, не ја поддржав иницијативата.
ФОКУС: Дали знаевте дека и потписите на Левица се на списокот, што подоцна очигледно беше проблем за пратениците Албанци?
РЕЏЕПИ: Левица беше внатре во тие 61 и имаше кажувања дека други партии имаат спремност да станат дел од коалицијата. Да ви кажам право, сум имал комуникација со партиите што беа споменувани и ми кажаа дека во ниту еден момент не сакале да бидат дел од таа коалиција, туку сакаа да се даде време и шанса на процесот, па доколку нема промени во функционирањето на владата, дури тогаш би иницирале промена на владината коалиција.
ФОКУС: Дали имавте проблем само со Левица или и со ВМРО-ДПМНЕ поради одредени нивни ставови?
РЕЏЕПИ: И од ВМРО-ДПМНЕ до ден денес има декларативни спорења на Преспанскиот договор, како резултат на кој станавме членка на НАТО. Немавме јасна визија од партиите што понатаму, дали ќе дадат јасен придонес кон интеграцијата кон ЕУ, или ќе не вратат назад па да го стават под знак прашалник и членството на НАТО, преку оспорување на договорите наместо тие да се имплементираат.
Сега, по инвазијата на Русија врз Украина, може ли да замислите каква би била позицијата на една влада во која би била Левица, па и ВМРО-ДПМНЕ, зашто во коалицијата на ВМРО има политичка партија која учествуваше на Конгресот на партијата на Владимир Путин?
НЕМАШЕ ПЛАН ШТО ПОТОА
ФОКУС: Дали притоа имавте план што понатаму? Или целта беше само ДУИ да се прати во опозиција?
РЕЏЕПИ: Една од причините беше да се формира влада без ДУИ. Но, не може главна цел на политичко делување да биде рушење на ДУИ. Што понатаму? Тука беше нејасно. Немаше јасен план што потоа. Каква ќе биде коалицијата, како ќе функционира…
Уште тогаш во консултација ми беше кажано дека ако успее интерпелацијата на владата и Левица се факторизира, проблематично би било дали интеграцискиот процес воопшто би останал жив. Вака, јас му дадов шанса на процесот…
ФОКУС: Сепак, пробивот кон ЕУ не дојде во декември, како што најавувавте, туку малку подоцна, и тоа е многу условено. Работата е далеку од завршена…
РЕЏЕПИ: Најавив дека ќе има прозападно ориентирана коалиција во Бугарија кога никој не знаеше за Кирил Петков. „Француски предлог“ дојде на маса. Малку процесот се одложи бидејќи не беше лесен, имаше отпор. Најавено беше за декември, но не се случи.
После, имаше избори во Франција. Многу индиикативно е што францускиот предлог се усвои и дојде на маса после завршување на француското претседателство.
Значи, Чешка го презеде претседателството и пак дојде францускиот предлог, од што се гледа дека навистина цело време имало процес кој беше помогнат и од САД.
ФОКУС: До денес постојано ве обвинуваат дека сте биле киднапиран. Може ли да се расчисти точно каде бевте тој ден?
РЕЏЕПИ: Конечната одлука ја донесов ден пред седницата, иако бев во процес на размислување и консултација со политички чинители и претставници на меѓународната заедница за да добијам на некој начин гаранција дека ќе се случи навистина тоа што се случи. Да не заборавиме дека почна скринингот и одиме по тој тек…
Останувам на ставот дека не сакам да ја откријам точната локација и пријателот кој ми обезбеди сместување на мене и моето семејство, да не ги изложам на шиканирање на какво што јас бев изложен.
ФОКУС: Дали тој пријател е поранешниот премиер Заев, како што јавно изјави Николоски од ВМРО-ДПМНЕ?
РЕЏЕПИ: Бев во куќа, стан на многу близок пријател. Јас имав намера да дојдам на седницата и дадам став, но мислењето беше дека тоа не е безбедно и тоа беше добар потег, бидејќи гледам оваа година имаше многу силни и остри реакции, навреди, па дури и на праг на физичка пресметка.
ФОКУС: Дали и од кого имавте закани? Дали се откриени и санкционирани тие што ви се закануваа?
РЕЏЕПИ: Имав закани од лажни профили од социјалните мрежи, но имаше една закани од реален профил, и тоа е пријавено и има постапка во обвинителството во Струга. За тоа трае процесот. Тој е симпатизер на една политичка партија, да не ја инволвирам сега. Зборувам за закани по живот.
ПРОМЕНА ПРЕКУ НОЌ
ФОКУС: Како гледате на овој феномен – тие што ве обвинуваа дека ја спасувате владата на ДУИ, или влегоа во оваа влада, како Алтернатива, или пак се на праг тоа да го сторат, ако се точни најавите околу Алијанса?
РЕЏЕПИ: Ако тогаш се зборуваше за некакви лични бенефити за мене, повеќе бенефити имаат овие парити отколку јас. Прво, Алтернатива стана дел од ова мнозинство, а гледаме во последно време има кокетирање, спремност и од страна на Алијанса за Албанците. Нема да биде чудно ако и тие станат дел од Владата.
ФОКУС: Дали имате информации за конкретни разговори за проширување на мнозинството со АА?
РЕЏЕПИ: Да, се работи на тоа да се зголеми мнозинството и да се прошири прогресивниот интеграциски блок. Сакаме да се изолираат партиите кои со нивните потези го опструираат процесот и работат во корист на други центри.
Некој како Левица јавно и отворено го изјавуваат тоа, други кажуваат дека се за интеграции, но на дело се гледа дека работат на опструкција на процесот.
Мнозинството сака сите политички партии да влезат во владата, да преземат одговорност и да бидат дел од овој процес. Но, ако тие партии многу остро и енергично ме напаѓаа мене како личност, сега после година дена доаѓаат на таа линија.
ФОКУС: Вие како Беса бевте дел од предизборна коалиција со СДСМ, па како така одеднаш се префрливте на страната на ВМРО? Навистина ли причината беше однесувањето на ДУИ во ДИК за изборите во Желино?
РЕЏЕПИ: Мислам дека тоа беше само преттекст на почетокот, бидејќи во меѓувреме Управниот суд, и покрај одлуката на ДИК, одлучи да нема прегласување за Желино. Значи, требаше да се промени позицијата.
Од друга страна, Зоран Заев тогаш како премиер имаше поднесено оставка, но се врати назад во игра. Многу моменти се сменија, а позицијата на колегите од тесното раководство на Беса не се променија. Тоа ми беше чудно.
Прашував дали има консултација со меѓународната заедница, како што сме имале со стратешките партнери во критични моменти. И видов дека беа определени по секоја цена да не бидат дел од Владата. Партијата беше заложник на поединци, кои заради нивното лично его го направија овој чекор.
ФОКУС: Дали сметате дека СДСМ на последните парламентарни избори преживеа поради предизборната коалиција со Беса, или пак Беса преживеа поради коалицијата со СДСМ?
РЕЏЕПИ: Мислам дека гласачите ќе ценат. Не можат така да се прават акробации од една на друга страна, иако некои партиски функционери можеби гледаат прагматично.
Беса со предизборната коалиција скрши еден мит. Една партија на Албанците направи предизборна коалиција со партија на Македонците.
На некој начин, со кршење на тоа табу отворивме простор потоа албанската опозиција да направи коалиција со ВМРО.
Вредеше таа коалиција со СДСМ, тоа беше добра придобивка за државата и општеството, иако не беше широкоградно прифатено и резултираше со загубени гласови и на Беса и СДСМ. Во некои средини не ги земавме гласовите што сами ги имавме, плативме политичка цена.
ЗАТСКРИВАЊЕ ЗАД КОАЛИЦИИ
ФОКУС: Кога почна комуникација меѓу Беса и ВМРО за соработка во Тетово и дали овие разговори беа транспарентни внатре во партијата?
РЕЏЕПИ: Кога има избори сите партии гледаат да соберат што повеќе гласови и тука не се бира, целта е да се победи. Јас бев потпретседател на Беса, координиратор на нашите четворица пратеници и имав информации дека има разговори и со ВМРО и со други партии од опозицијата за Тетово. Немавме комплетни информации како се договори поддршката, дали имаше некој услов Беса по секоја цена да не биде дел од мнозинството од кое беше дел.
ФОКУС: Дали цената беше Касами да стане градоначалник? Толку ли беше битна победата во Тетово, за да се растури коалиција на централно ниво?
РЕЏЕПИ: Тетово е еден поголемите градови на Албанците и важен е во овој систем на гласање, тоа е оштина во шестата ИЕ, каде лидерите на партиите обично се носители и тука се кршат копјата. Дали Тетово значи гаранција за успех, ќе видиме на следните избори. Но, некои од лидершипот мислеа дека битно е само да се добие Тетово.
ФОКУС: Гледаме невиден триумфализам по победата на Касами и Беса во Тетово, но колку тоа е издржано, ако се знае дека Беса во другите средини многу слабо котира? За волја на вистината, сите албански опозициски партии имаат само локалет домет.
РЕЏЕПИ: Ако има соработка на сите албански опозициски партии, тие би биле јак конкурент на ДУИ. За жал, никогаш не успеало. Проблемот е што лидерите се борат кој ќе биде прв во опозиција, кој е шампион во втора лига.
И цело време бил тој спор. Сега ќе биде уште потешко за соработка. Анкетите покажуваат дека и сите 3 да имаат соработка пак ќе биде тешко да го победат ДУИ.
Бидејќи многу се манипулира после коалиции и секоја партија се повикува на тие гласови, најдобро е секоја партија сама да оди на гласање и после да знаеме која партија колку тежи, па постизборно да се направат коалиции. Вака некои партии и функционери се кријат за коалиции.
ФОКУС: Нели тоа е рецепт за доживотен успех на ДУИ? Може ли да се победи ДУИ без да се формира еден голем анти-ДУИ пакт?
РЕЏЕПИ: Досега е докажано дека тоа е невозможно, а и отсега, како се движат работите, и сите акробации на партиите, дополнително и ја олеснуваат позицијата на ДУИ на изборите.
Не може да гласате за партија која среде мандат менува позиција или за партии кои биле во влада па за мали спорови излегува од влада. Гласачите сакаат да гласаат за партии кои ќе бидат дел од мнозинство и ќе опстојат.
ДЕБАТА НАМЕСТО УСЛОУВАЊЕ
ФОКУС: Колку сметате дека се злоупотребува европската приказна, која ја нагласуваат многу партии кога влегуваат во влада? Дали во суштина се работи за битка за функции и привилегии?
РЕЏЕПИ: Морам да сум искрен и да кажам дека албанските партии имале јасен став околу интеграциите, што го докажале после Преспанскиот договор и уставните измени, кога Алијанса и Беса како опозиција беа дел од двотретинското мнозинство за промена на Уставот. Не дека албанските партии не се за европската приказна, но може поддршка да дадат и како опозиција. Сигурно, кога си дел од владата е подобро за субјектот, има бенефиции, се акомодираат дел од структурите…
ФОКУС: Секогаш кога се отвора Уставот има обид да се импутираат дополнителни барања од опозицијата. Вие своевремено условувавте со промена на законот за лични карти, сега има барања за замена на нормата „20 отсто“ со албански јазик итн. Зошто на тој начин дополнително се оптоварува процесот?
РЕЏЕПИ: Кога се менуваше Уставот, беше договорено со закон да се интервенира да се внесе етничка припадност во личните карти, и тоа во процес во иднина.
Ова се отворени прашања и прашањето со нарекувањето на албанскиот јазик најкоректно го кажале и претставници од ВМРО и СДСМ. Не се работи за условување, туку да се отвори дебата. Треба да сме на чисто кога ќе се прават уставните измени кој дел ќе биде тема на промена.
Не треба да се условува, но за некои прашања има консензус од сите партии. На еден состанок на опозициските партии организиран од Конрад Аденауер, кога првпат се сретнаа ВМРО и Алијанса после 27 април, имаше укажувања од лидерот на ВМРО-ДПМНЕ Христијан Мицкоски дека тој нема ништо против замена на „20 отсто“ со албански јазик…
ФОКУС: Да, но тој сега поставува и контрауслови – да се тргне бадентерот и балансерот. Каде е тука е крајот?
РЕЏЕПИ: Малку ретерираше, но може тоа покажува колку бил искрен порано.
Премиерот Димитар Ковачевски, пак, од порано има изјави дека нема против ова. Исто така, повеќето партии сакаат ова да се промени, но ниедна албанска партија нема да гласа против ако не се исполнат барањата. Тие се дел од еден процес и добро е што поскоро да ги решиме. Сепак, ако не може сега, тогаш треба понатаму.
Јас сум против условувањето кое би го загрозило интеграцискиот процес, за што јас лани постапив, ставајќи се самиот себе си и семејството во незгодна ситуација, бидејќи на многу луѓе не им се допадна.
ВОЛЈАТА ЗАВИСИ ОД ОКОЛНОСТИТЕ
ФОКУС: Дали очекувате да се соберат 80 пратеници за нова промена на Уставот, неопходна за отворање на преговарачките поглавја? Колку е реално тоа?
РЕЏЕПИ: Јас да, верувам во тоа, зашто сам сум гласал против позицијата на политичката партија, иако немаше одлука на органите. Гласав различно од партијата. Исто така, мислам дека секогаш ќе има совесни пратеници да го искористат уставно загарантираното право да гласаат по сопствено убедување, иако не би било во линија со партијата.
ФОКУС: Меѓутоа, сите пратеници на ВМРО-ДПМНЕ потпишаа нотарски изјави дека нема да поддржат уставни измени под овие услови.
РЕЏЕПИ: Сметам дека тоа е бламажа. Тоа нема правна сила. Не се работи овде за заем или не знам што.
ФОКУС: Сепак, тоа е на некој начин демонстрација на политички став.
РЕЏЕПИ: Политичката волја или позиција не е нешто апсолутно што никогаш не се менува. Врз основа на околностите може да се промени.
И од ВМРО-ДПМНЕ како најголема опозициска партија велат дека се за зачленување во ЕУ, па зошто би блокирале еден процес кој би помогнал да се оди напред и да се развира процесот?
ФОКУС: На какви „околности“ мислите?
РЕЏЕПИ: Мислам дека ќе се обезбедат низ процес. Сега веќе имаме поинакви изјави од Мицкоски, кој вели дека би поддржале ако имаат одредени гаранции итн, а порано цврсто велеше нема да има. Како еволуира неговата позиција, тука и размислувањата на пратеници се менуваат, тие се свои личности.
Од една страна имате позиција дека без промена на Уставот не може да одиме понатаму во процесот што го чекавме толку години да го започнеме, или да ја држиме државата и граѓаните како заложник надвор од процесот, во кој потоа би имале силна поддршка од ЕУ и со фондови и сите бенефити кои земјите членки ги имаат.
ФОКУС: Опозицијата вели дека нема ништо против, но, според нив, тоа нема да го реши проблемот и не значи дека преговорите непречено ќе течат.
РЕЏЕПИ: Ова е гаранција дека преговорите ќе почнат, а што понатаму никогаш не може да знаеме. Дали ќе имаме нова блокада од Бугарија или некоја друга членка. Но, како и досега, беше поздравено надминувањето на несогласувањата со Бугарија со „францускиот предлог“, може да продолжиме без да имаме некакви пречки. Тоа ќе зависи од нас, како ќе бидеме во реформите, во исполнувањето на условите во поглавјата. Мислам дека има силна поддршка од ЕУ и САД ова да се исполни, за да не останеме некако сива зона во сите политички констелации што ги имаме.
ФОКУС: За Преспанскиот договор се обезбедија 8 пратеници, но тогаш некои од нив се соочуваа со судски процеси. За повисока цел, практично се истргува со правната држава. Можно ли повторно да прави ваков пазар и што мислите вие за тоа?
РЕЏЕПИ: Не се согласувам со било какви пазарења. Ние треба како општество и демократија да одиме напред, да достигнеме ниво еден пратеник за одредени прашања да одлучи според убедувања и да не биде анатемисан од својата партија како црна овца и да стане мета на јавен линч.
Знам дека сме далеку од тоа, но сакам сега со уставните промени да се направи уште еден чекор. Јас еден чекор направив лани, претходно напрација 8 пратеници и така ја развиваме демократија.
КУПУВАЊЕ НА СЛОБОДАТА
ФОКУС: Ако се случи така како што кажувате, Мицкоски треба да си оди зашто сам рече ќе се повлече ако еден пратеник гласа за уставни промени. Во меѓувреме гледаме се работи на формирање на една проевропска коалиција чија цел е изолација на ВМРО и Левица. Дали тоа води кон силна поларизација на следните избори?
РЕЏЕПИ: Досега доста полазириано е општеството и електоратот, посебно во делот на македонскиот блок каде има две големи партии, кај Албанците има повеќе партии, настануваат нови…
Луѓето проценуваат дека сите наративи за предавници и патриоти се параван за некои други работи. Обвинувањата за корупција со коруптивни луѓе во партијата немаат кредибилитет и затоа опаѓа излезноста на избори. Затоа партиите ќе треба да ја променат методологијата и без популизам да настапат.
ФОКУС: Дали се согласувате дека албанската опозиција недоволно ја нагласува темата за криминал, корупција, владеење на правото…? Програмски може да, но во јавноста не доминира таква реторика. Гледаме натпревар во популизам и национализам со ДУИ.
РЕЏЕПИ: Во секоја програма ја има борбата против корупцијата. Во последно време и со овој процес на интеграции ќе мора да има резултати во бробата против корупцијата. Веќе се гледаат некои резултати. Би сакал тоа да биде поенергично, но има подобрување.
Во минатото, системот и апаратот беше контролиран од поедини функционери. Во време на „режимот“, немавме судски процеси. Сега има два секретари на владата, за функционери, има оставки за лекари, значи има некои промени.
ФОКУС: Но има и еден факт – ретко има процес, а никогаш немало пресуда за функционер на ДУИ. Како го толкувате тоа?
РЕЏЕПИ: Лидерот на ДУИ Али Ахмети самиот повикуваше да се направи пакт за борба против корупција. Зошто нема функционери не можам да кажам. Судските органи треба да ја вршат нивната работа. А граѓаните да создадат една култура да пријавуваме криминал во иституциите, да ја зголемиме довербата. Слабо се пријавува зашто никој не верува во епилог. Така било во минатото, но сега гледам надеж.
ФОКУС: Сега овој период имавме спогодби за признавање на вина во крупни процеси за финансики криминал. Тоа може ли да се оцени како успешна борба против криминалот и корупцијата?
РЕЏЕПИ: Тоа беше интерпретирано како подобро да вратиме средства во државата отколку некој да осудиме, што јас сметам дека е купување на слободата и не се согласувам со тоа. Тоа е е лош пример за идните генерации. Ќе се направат злоупотреби на крај со тие пари стекнати по пат на злоупотреба да се плати слободата?!
ЛАЖНА ЗАГРИЖЕНОСТ
ФОКУС: Дали се уште делувате како независен пратеник, бидејќи беше објавена фотографија со Вас, Меџити и другите функционери на ДУИ што побараа промени во партијата?
РЕЏЕПИ: После ланското гласање, делувам како независен пратеник. Јас сум личен пријател со Изет Меџити од поодамна, кога не бев во политика. Во овој период после гласањето, сме имале контакти и сум имал негова морална поддршка. Не беше лесен период за мене.
Јас имав кафе-средба со Меџити и Блерим Беџети. Нормално како пратеник што делував да продолжи ова мнозинство за да може процесот да истрае, бев заинтересиран што поконкретно се случува во ДУИ во правец на тоа дека нема да дојде до знак прашање мнозинството.
ФОКУС: Како ви изгледаат внатрепартиските превирања во ДУИ? Во опасност ли е партиското единство и парламентарното мнозинство?
РЕЏЕПИ: Не сум слушнал дека Ахмети избркал некој од партија, иако имало луѓе што не се согласувале. Сами да излезат имало, но да избрка некој не сум слушнал. Тоа е внатрешна дебата и не знам како ги имаат регулирано односите, кои се обврските на министрите кон партиските структури.
ФОКУС: Нивно главно барање е промена на Артан Груби. Што мислите вие за Груби, дали тој е добар министер и како би гласале при евентуална интерпелација?
РЕЏЕПИ: За интерпелација беше кажано дека е работа на опозицијата и Беса најави, но се откажа. Една опозиција нема капацитет да покрене една иницијатива за интерпелација, а треба тоа да го прават секој ден штом имаат толку забелешки.
Што се однесува до владата, знам дека перформансот може да биде подобар. Со интерни комуникации со премиерот и министрите се залагам за да се забрзаат некои работи, некои работи се развлекоа, знам дека може подобро.
Но, сум задоволен од ова мнозинство и верувам дека е најдобра моментална комбинација и за интеграцискиот процес и за справување со кризите.
ФОКУС: Дали имате комуникаија со поранешните сопартијци од Беса?
РЕЏЕПИ: После големата загриженост дека сум бил киднапиран и држен некаде, очекував после тоа да имам средба. Им напишав на Касами и Хоџа и побарав да се видиме. Немаше одговор, што покажува дека нивната загриженост за мојата безбедност била лажна.
Јас бев исклучен преку социјалните мрежи. За разлика од ДУИ и другите партии, во Беса немаше спремност да се дебатира, за да го кажам мојот став зошто вака постапив. Но, комуникација имам со голем дел членови и функционери. И со еден колега од пратениците имаме човечка нормална комуникација.
НАПАДОТ Е НАЈДОБРА ОДБРАНА
ФОКУС: Меѓу другото, ве обвинуваа и дека сте биле купен да не се појавите на седницата за недоверба. Има ли вистина во тоа?
РЕЏЕПИ: Видете, има една поговорка – нападот е најдобра одбрана. Јас знам дека Беса од каде потекнувам цело време тврдеше дека ова мнозинство продолжува и дека не може да има промена на мнозинството без избори. И тогаш се случи промена преку ноќ и тие треба да објаснат зошто одлучија да ја урнат владата од која самите беа дел. Лесно е да се етикетира, на крај времето докажува и ќе докаже кој и зошто одличил како што одлучил.
НЕ СУМ ВРЗАН ЗА ЛИЧНОСТИ
ФОКУС: Каде беше проблемот за поделбата на Беса, по што започна падот на партијата после успехот на изборите во 2016 година?
РЕЏЕПИ: Истите луѓе што го предложија Биљал Касами да биде кородинатор и иден претседател, после извесен период кога се етаблира партијата, бараа од него да ја напушти позицијата. Тука беше целиот конфликт. Тој одби да се повлече. Не знам како се договориле.
ФОКУС: Како вие одлучуваме да останете во Беса, а не да заминете во Алтернатива? Што ви беше пресудно?
РЕЏЕПИ: Јас за првпат политички се ангажирав во Беса и јас бев со партијата, не сум врзан со личности, како што некои се. Реков тука беше партијата, претседателот, органите и продолжив така.
ФОКУС: Каква е улогата на Аднан Исмаили околу партијата во идеолошка, финансиска смисла…
РЕЏЕПИ: Јавна тајна е дека секоја партија ја поддржуваат поедини луѓе. Тој беше близок човек на партијата и сигурно ја дал помошта. Кога бевме ние заедно, можам да кажам дека беше во постојана комуникација со лидершипот и имаше влијание. Понатаму сега со Алтернатива како е – не знам.