„Анима мунди“ остро реагира поради „чистката на чавките“ во Прилеп

by Фокус 12:52
12:52

Здружението за заштита на животните „Анима мунди“ денеска остро реагираше на вчерашната акцијата за „чистење на чавките“ од Прилеп.

– Шокирани сме за дивјаштвото кое дознавме преку локален портал кој информира дека во тек на вчерашниот ден се убиени голем број птици и бараме итно да се запре ова крвопролитие врз интелигентни, социјализирани и мирни битија (а не агресивни птици како што наведува порталот) кое ќе остави крвава дамка на репутацијата на градот. Инсистираме на итни санкции за сторителите и казни зашто истите не само што масакрирале птици, туку ја загрозиле безбедноста на жителите на Прилеп! Куршумот не бира кого убива! – реагира „Анима мунди“.

- Advertisements -

Здружението потенцира дека не живееме во примитивно општество туку во 21-от век и дека ваков чин секаде во Европа би бил најстрого осуден.

– Ваквите чистки се срам за градот, срам за државата и мора да запрат! Чавката не е, цитираме, „птица која навестува зло, штета, елементарна непогода, смрт“, туку живо битие кое е неопходно во природниот еко-систем, интелигентна и урбана птица која оформува силни социјални врски во своето семејство, а не кобник! Бараме итно градоначалникот на Прилеп, Марјан Ристески јавно да се огради и го осуди ваквиот чин, како и да се казнат сите сторители, кои убивале животни и ја загрозиле јавната безбедност – велат од асоцијацијата.

Оттаму бараат Агенцијата за храна и ветеринарство, Секторот за заштита на животните и пред сѐ Директорот на Агенцијата, Зоран Поповски да ги дознаат учесниците, сторителите и оние кои ја осмислиле оваа, според нив, монструозна акција и да нидат казнети.

– Се обраќаме и до Министерството за внатрешни работи, министерката Гордана Јанкулоска со барање да се покрене кривична постапка за сторителите бидејќи истите го прекршиле Кривичниот Законик и предизвикале јавна опасност – велат од Анима мунди.

Поврзани новости