Ален Зекиров доби отказ од МВР по дисциплинската постапка за „крвавиот четврток“

Ален Зекиров, кој работеше како главен инспектор во одделот за тероризам во Управата за безбедност и контраразузнавање, пред три дена добил отказно решение од Министерството за внатрешни работи, објави 24вести.

Решението, потпишано од министерот Оливер Спасовски, следи по дисциплинската постапка за Зекиров, спроведена за неговото учество во настаните во Собранието од „крвавиот четврток“.

Зекиров е поранешен личен телохранител на екс шефот на УБК, Сашо Мијалков. На видео снимките во Собранието од 27-ми април, Зекиров е забележан меѓу толпата која упадна во законодавниот дом. Пред шест години удри и усмрти пешак со велосипед на булеварот Партизански одреди. Судот му одреди шест месеци затвор.