Загрижува информацијата за пронајден куршум во дворот на лидерот на Алијанса за Албанците, Арбен Таравари вели претседателот на СДСМ, Димитар Ковачевски. Според него МВР треба да интервенира и во овој случај, исто како што интервенираше во врска со вчерашниот напад на директор на владина институција.
-Секако дека ме загрижува ова. Се информирав дека МВР веќе има интервенирано во делот на тепачката која што се има случено вчера во Тетово, каде што е нападнат директор на владина институција од страна на лице кое што е идентификувано со име и презиме. Сметам дека МВР тоа треба да го заврши. И доколку и оваа информација која што сега ја споделивте е точна, тогаш треба на ист начин ригорозно да се интервенира, рече Ковачевски за време на неговата посета на градинката „Пролет“.
Тој рече дека секоја политичка партија одлучува во рамки на своите органи за тоа како ќе се постави во политичкиот простор. Според Ковачевски, останува на Алијанса за Албанците да одлучи дали ќе е за ЕУ или за „некакви недефинирани алтернативи“.
-Секоја политичка партија ги бира своите коалициски партнери согласно вредностите кои ги дели. На изборите во 2024 година ќе имаме два блока на политички партии, едниот кој ќе биде за европски интеграции и другиот кој ќе биде за изолација. Едниот блок кој ќе биде за Северна Македонија членка на ЕУ, дел од Западна Европа и Северна Македонија, вториот блок, со некаква алтернатива нејасна, необјаснета од никого, која што ќе гледа повеќе на Исток отколку на Запад. На Алијанса е да одлучи дали ќе оди на Запад или ќе оди на Исток, дали ќе оди за Европа или ќе оди за некакви недефинирани алтернативи коишто никој не ги објаснува. Тоа е сепак нивна одлука, рече Ковачевски и нагласи дека не може да даде лично мислење за која било политичка партија, бидејќи станува збор за нивни лични одлуки.