ВМРО-ДПМНЕ бара да престане важноста на Етичкиот кодекс на пратениците, еден ден откако воопшто не беше отворена расправата за поведената дисциплинска постапка за претседателот на Собранието, Талат Џафери. Според нив, тоа што мнозинството спречило да се одржи оваа дебата покажува дека кодекс не се почитува. Иницијативата содржеше аудио-докази за пцовките и навредите од Џафери кон вработени во Собранието.
Пратениците од македонската опозиција побараа предлогот веднаш да се стави на дневен ред, но тој сè уште не е преведен.
На пленарната седница денеска беа отфрлени и другите предлози на ВМРО-ДПМНЕ кои се однесуваа на намалување на акцизата за горивата за 50% и намалување на ДДВ-то на горивото од 18 на 5%. Од оваа партија најавија дека нема да се откажат од оваа иницијатива. Истите иницијативи повторно ќе ги предложат, но со итна постапка.
Чекорите на опозицијата беа дел од нивното дејствување со цел активно блокирање во Собранието, отежнувајќи го одобрувањето на дневниот ред за нови седници.