Солидарност: Ниту еден ден повеќе за оваа Влада без легитимитет

by Фокус

Левичарското здружение „Солидарност“ одржа итно заседание по вчерашните објавени снимки на лидерот на опозицискиот СДСМ за изборните нерегуларности во земјава направени од владејачката гарнитура. Тие се шокирани од се што слушнале во аудио-снимките и од начинот на кој првата полицајка Гордана Јанкулоска, министерот за транспорт и врски Миле Јанкаиески, премиерот Никола Груевски, генералниот секретар на владата Кирил Божиновски, шефот на кабинет на Груевски, Мартин Протоѓер и дел од нивните соопартијци ги прават изборните местенки.

– ЛД Солидарност со шок и неверување ги проследува последните политички случувања во Македонија. Фрапирани од нечовечноста, подлоста и злоупотребите на владеачката врхушка, ние се согласуваме со мнозинството граѓани на Република Македонија – оваа Влада нема легитимитет да владее ниту ден повеќе! Сите оние функционери кои деновиве ги слушаме како заговараат уништување на македонското општество не само што мора да си одат, туку никогаш повеќе не смеат да извршуваат јавни функции! Нашата граѓанска должност во моментов е тоа да им го кажеме јасно и гласно, да се погрижиме тие да си заминат, а со нив и нивните методи на владеење – се наведува во соопштението од „Солидарност“.

Според нив, објавените снимки за изборните нерегуларности укажуваат на тоа дека уставниот поредок и демократските институции се држат во заложништво од страна на кланот на Никола Груевски.

– Притоа, владините функционери имаат нечовечки и садистички однос кон обичните граѓани – вклучувајќи ги и нивните противници – но и нивните поддржувачи и гласачи! За нив сме „човечиња“ и „гревови“ – топовско месо лишено од основните политички права и какво било достоинство. Згрозувачки се и притисоците и нехуманиот третман на јавната администрација и полицијата. Конечно, заканите по животите на неистомислениците и нивните фамилии се индикатор за моралното дно кое владеачкиот клан го има достигнато! – стои понатаму во соопштението.

Од таму додаваат, дека поголемиот број од граѓаните на Македонија веќе немаат илузии за тоа каде живеат.

– Но, многу од нив се сеуште спречени да го изразат својот револт. Токму затоа, денес ЛД Солидарност апелира првенствено кон членството на партиите на власт, вработените во јавната администрација и полицијата, медиумските работници и сите оние кои во изминативе девет години биле изложени на притисок од страна на власта: се солидаризираме со Вас и Ви подаваме рака да станете за своите права! Ја имате нашата поддршка за Вашиот глас да биде чуен! Ова е Вашата шанса да им се измолкнете од канџите на овие нелуѓе, и да учествувате во изградбата на демократско и социјално праведно општество. Бидете храбри! Големото прашање е што во периодот кој следува? Знаејќи го вистинското лице на Никола Груевски и неговите соработници, нивната узурпација на судството, медиумите и стопанството, очекуваме големи притисоци и провокации. Токму затоа потсетуваме, дека во овој период, нашата должност ќе биде да делуваме активно и солидарно, но пред сè трезвено, совесно и одговорно. Наша цел не е само соборување на корумпираните елити, туку и коренита општествена и системска промена – се наведува во соопштението.

Ставот на ЛД Солидарност е дека во овој момент е потребно итно формирање на нова, привремена Влада составена од непартиски експерти. Нивната задача ќе биде да обезбедат услови за ослободување на државата од нелегитимната криминална власт, како и враќање на институциите на тие на кои тие им припаѓаат: граѓаните. Дел од чекорите во таа насока би биле: (1) конечно спроведување на попис и прочистување на изборните списоци; (2) испитување на инволвираноста во криминални активности на раководните лица во јавната администрација во периодот 2006-2015; (3) гарантирање на фер и балансирано известување од страна на јавниот сервис; и (4) конечно спроведување на фер и демократски избори кои ќе ги задоволат Уставот и стандардите.“ се вели во соопштението.

Поврзани новости