Владата ќе остане посветена на изнаоѓање решенија за сите прашања што ги отворија синдикатите, порачува премиерот, Димитар Ковачевски.
-Синдикатите бараат уште повеќе зголемување на платите. Ние нормално дека разговараме со нив, сите одлуки до сега беа носени низ социјалниот дијалог со синдикатите. Меѓутоа треба да ги имаме предвид сите аспекти на економијата, а ние сме во секојдневна комуникација и неделна координација со Народната банка, бидејќи не смееме да дозволиме одредени мерки коишто би се носеле од фискалната политика да влијаат негативно на монетарната политика и да ја подгреваат инфлацијата, изјавил премиерот во интервју за МИА.
Се работи за исклучително тешка економска криза, најголема после Втората светска војна, нагласува Ковачевски, и додава дека Владата сите ресурси ги насочи за справување со неа со намалување на тековните трошоци во буџетот, со ограничување на непотребните трошења како што се трошоци за репрезентација, трошоци за набавка на возила, на мебел и така натака, освен она што е најнеопходно за образование, за војската, сé со цел да се ослободат финансиски средства за граѓаните и особено за оние коишто се најранливи.
-Јас знам дека нашите граѓани ја чувствуваат кризата, се работи за исклучително тешка економска криза. Ние сите ресурси ги имаме насочено кон справување со истата. Презедовме мерки за да ја одржуваме ликвидноста на компаниите и ликвидноста на енергетскиот сектор и како држава одлучивме 80 проценти од сметките за електрична енергија да ги субвенционираме, бидејќи сметаме дека не смее ценовниот шок да се прелее кај граѓаните.
Само за споредба до колку не се тие мерки цената на електрична енергија, односно сметките за струја на граѓаните би биле за 2.150 денари повисоки, сметките за храна би биле повисоки за 1.500 денари месечно доколку не беа ограничувањата на маржите и намалувањето на ДДВ, а нафтените деривати би ги плаќале само основ на ДДВ, без намалувањето на акцизата, 300 денари повеќе и сметам дека граѓаните тоа го препознаваат, изјавил Ковачевки.