Родителите на деца со попреченост, со Даунов синдром и со ретки болести вчера и денес реагираа дека им се крати посебниот додаток што го примаат поради новиот Правилник на Министерството за труд и социјална политика. Деновиве кога се обиделе да го остврата правото на посебен паричен додаток од новоформираната Комисија која треба да ја процени попреченоста им било кажано дека Дауновиот синдром не е наведен во правилникот и им побарале дополнителни документи.
Родители на деца со попреченост велат дека откако тоа го објавиле се јавиле и родители на деца со ретки болсти и други видови попреченост кои имале потешкотии во остварување на ова право.
Како што објаснуваат родителите досега категоризацијата на попреченост се правеше во Центарот за ментално здравје, а сеге се прави во новата Комисија. Тие реагираат дека во Комисијата која ја оценува попречченост нема соодветни специјалисти и дека особени потешкотии имаат децата кои за прв пат го остваруваат ова право.
Според податоците на официјалната страница на МТСП, висината на посебниот додаток за 2022 година изнесува 5.365 денари. Износот на посебниот додаток се зголемува за 50% и за 2022 година изнесува 8.047 денари за самохран родител кој има дете со попреченост до 26 години живот. Износот на посебниот додаток се зголемува за 25% и за 2022 година изнесува 6.706 денари за материјално необезбедени родители, кои се корисници на гарантирана минимална помош кои имаат дете со попреченост до 26 години живот.
Од Министерството за труд и социјална политика објасниуваат дека со новиот Правилник за проценка на потребите за лицата со попреченост, кој е изработен според Меѓународната класификација на функционирање не се наведени дијагнозите за болестите или синдромите од кои страдаат децата, туку се цени нивната функционалност и попреченост.
-Со овој модел не се поставува дијагноза, туку се цени функционирањето и попреченоста на детето. Дауновиот синдром е само една од многуте дијагнози кои спаѓаат во категориите од Законот за заштита на децата и затоа нема потреба да се содржи индивидуално како дијагноза. Во спротивно, би требало да бидат наведени сите дијагнози кои спаѓаат во поединечните категории. Исто така лицата со Даунов синдром имаат различно ниво на функционирање и не сите се соочуваат со ист степен на попреченост, велат од МТСП.
Од Министерството велат дека од стручните лица вработени во Службата за функционална проценка, на детето ќе му биде извршена проценка во однос на неговата функционалност, колку истото може да функционира и е попречено, а не во однос на дијагнозата.
-Со Законот за изменување и дополнување на Законот за заштита на децата исто така се уреди начинот на водење на започнатите постапки и на стекнатите права на посебен додаток при што се утврди дека стекнатото право на посебен додаток продолжува да се користи до истекот на датумот утврден во наодот и мислењето за контролен преглед-рекатегоризација. По истекот на овој наод и мислење корисниците на правото потребно е да направат нова проценка во Службата за функционална проценка, каде ќе се утврдува попреченоста на детето, а не неговата дијагноза, изјавија од МТСП.
Министерката за труд и социјална политика Јована Тренчевска денес негираше дека е укинат посебниот додаток за децата со Даунов синдром.
-Не е укинато ниту едно право на лице, односно дете со попреченост, изјави Тренчевска, и додаде дека со измените на Законот за детска заштита со кои се зголемени средствата на децата кои примаат посебен детски додаток.
-Станува збор за 8 деца од вкупно 120 кои немале комплетна медицинска документација и кои при посетата на соодветната комисија добиле негативен наод и веќе како министерство стапивме во контакт со тие деца и со комисијата и ќе се направи повторен увид за да се даде повторно оцена и наод, изјави Тренчевска.