Раиси му одговори на Бајден: „Иран нема да започне војна, но ќе одговори на насилниците“

Иран нема да започне војна, но „силно ќе одговори“ на секој што ќе се обиде да го малтретира, изјави денеска иранскиот претседател Ебрахим Раиси.

– Нема да започнеме никаква војна, но ако некој сака да не малтретира, ќе добие силен одговор – рече Раиси во телевизискиот говор.

Според него, Вашингтон ја променил својата реторика и сега тврди дека нема намера да се судри со Иран, иако претходно предупреди дека на маса е воена опција.

– Претходно, кога тие (Американците) сакаа да разговараат со нас, рекоа дека воената опција е на маса. Сега велат дека немаат намера да се судрат со Иран – рече Раиси.

Иранскиот претседател нагласи дека Техеран не е закана за ниту една земја во регионот.