Во рамки на официјалната посета на Република Турција, по остварените посети на високи и значајни институции од областа на правосудството, делегацијата предводена од претседателот на Уставниот суд на Република Македонија, Сали Мурати, оствари средба со претседателот на Република Турција, Реџеп Таип Ердоган, на која присуствуваше и претседателот на Уставниот суд на Република Турција, Зухту Арслан.
Во состав на делегацијата се судиите Елена Гошева, Јован Јосифовски и д-р Осман Кадриу и советникот м-р Љубица Ангелова.
На оваа средба, претседателот на Уставниот суд, Мурати истакна дека делегацијата престојува во официјална посета по покана на Уставниот суд на Република Турција со цел разменување мислења и искуства за актуелни уставно-правни прашања од посебен интерес за двата суда. Во контекст на ова, особено ги потенцираше воспоставените одлични односи помеѓу двата уставни суда чија соработка трае подолг период, но истовремено изрази и надеж за продолжување и унапредување на истата, како и со другите високи судски органи.
Претседателот Мурати се заблагодари и за поддршката од турската агенција за соработка и координација – ТИКА насочена кон јакнење на капацитетите на Уставниот суд и на другите високи судски органи од Република Македонија.
Претседателот на Република Турција, Ердоган искажа задоволство од одличните и братски односи помеѓу двете земји, но ја нагласи и поддршката која Република Македонија ја добива во периодот од кога е на чело на највисоките раководни позиции во Република Турција.
Претседателот Ердоган истакна дека помеѓу двете земји досега биле воспоставени односи на заемна соработка и дека го радува фактот што во рамки на своите можности и надлежности се остваруваат пријателски односи со државните органи на пријателска Република Северна Македонија и дека секогаш ќе се залага за нивно унапредување. Истакна и дека го радува фактот на воспоставената добра соработка помеѓу двата уставни суда, односно дека секогаш ќе дава поддршка за продолжување на истата.