Денес на цела македонска јавност и стана јасно дека Зоран Заев и неговото семејство делат поткуп, вели потпретседателот на ВМРО-ДПМНЕ Александар Николоски, по полициската акција во Струмица во магацинот каде волонтери пакувале пакети со храна од донациите на семејството на лидерот на СДСМ Зоран Заев.
„Во услови на најтешка здравствена и економска криза тие нечовечки се обидуваат за неколку прехранбени производи да купат луѓе, да го купат нивниот глас на следните избори затоа што само на тоа мислат. Денес на цела Македонија и се потврди тоа што Струмица долго време го знае дека Заев победуваше за градоначалник не на чесни туку на наместени избори во кои тој купуваше масовно гласови. Тоа го видовме и од материјалите објавени во италијанскиот весник „Ла верита“, напиша Николоски на фејсбук.
Притоа, тој праша колку вкупно т.н. помош била поделена со точни количини на сите продукти и дали Заев може да покаже фактури дека тие производи се платени?
„Или истите се обезбедени со рекет од фирмите производители и дистрибутери? Да докаже потекло на парите со кои се платени ако се платени? По кој критериум се поделени производите, зашто на едни граѓани се делени, а на други не? Дали донациите се пријавени? Бонус прашање за денес – ако е се во ред зашто брат му Вице урлал во полициска станица во Струмица вчера и се заканувал од позиција на сила на полициските службеници?“, праша Николоски.
Инаку, од МВР соопштија дека полицијата затекнати 11 лица и пакети и бил извршен увид, додека Заев реагираше дека ВМРО-ДПМНЕ преку полициски структури попречува хумантирна помош за граѓани преку злоупотреба на државни институции.