Министерство за внатрешни работи соопшти дека извршени се претреси во две фирми во Неготино, каде се одгледува канабис.
„Вчера врз основа на судска наредба, полициски службеници од Одделот за криминалистичка полиција, Сектор за недозволена трговија со дорга, оружје и опасни материи, Единица за недозволена трговија во координација со ОВР Неготино и членови на Комисија за оценување на исполнетост на условите по однос на простор, опрема и кадар за одгледување на канабис за медицински цели при Министерството за здравство извршиле претрес во простории на две правни лица во Неготино овластени за одгледување канабис за медицински цели“, соопшти МВР.
Од МВР велат дека при претрес во едното правно лице било констатирано дека од четири реколти недостасуваат околу 40 килограми од канабис.
„Констатирани се и низа неправилности со кои правното лице постапувало спротивно на член 62, член 29-Д, член 29-Г и член 95-В од Законот за контрола на опојни дроги и психотропни супстанции. Додека, при претресот во другото правно лице бил пронајден сув цвет од канабис за кој било доставено известување до комисијата, сув цвет за кој допвра ќе се достави документација до комисијата, а биле констатирани и повеќе неправилности со кои правното лице постапувало спротивно на членовите 29-Г, 29-Д и 29-Ѓ од Законот за контрола на опојни дроги“, соопшти Министерството за внатрешни работи.
Според МВР по целосно докумнетирање на случајот, во координација со јавен обвинител, против правните и одговорните лица ќе бидат поднесени соодветни пријави.