Откако Организацијата на работодавачи побара да се укине обврската за исплаќање на регрес за годишен одмор или К-15, денеска тоа го стори и Комората на северозападна Македонија. Тие велат дека во ваква криза не може да се наметнува таква обврска за компаниите.
Следната недела работодавачите и синдикатите ќе започнат преговори за измена на општиот колективен договор за приватниот сектор. Како опција ќе биде понудено исплаќање на К-15 само доколку компанијата има пари.
Претходно, претседател на Организацијата на работодавачи, Ангел Димитров за весникот Вест изјави дека многу компании имале финансиски тешкотии за исплата на К-15, а дел од нив ги скратиле платите за да исплатат регрес или земале кредити.
Претседателот на Сојузот на синдикати, Живко Митревски рече дека исплата на К-15 стои во општиот колективен договор, но за модалитетите можело да се зборува.