Љупчо Палевски – Палчо, кој е осомничен за двојното убиство што ја потресе македонската јавност, беше ,,таргет” и на СЈО, но никогаш против него не беше поднесено обвинение и не беше осуден.
Неделникот ,,Фокус” пред три години истражуваше што се случи со случајот ,,Никола Тесла”, кој водеше до името на Палчо, но и до мотивите зошто предметот се кочи.
Поточно, во 2017 година Палчо беше уапсен, поради сомнеж дека објавува нелегални прислушувани разговори, но предистрага никогаш не беше завршена.
Поточно, во 2016 година на јутјуб-каналот „Никола Тесла“ почнаа да протекуваат прислушувани разговори, од кои повеќето приватни. Тогаш најзасегнати беа пратеничката Ермира Мехмети, лидерот на ДУИ, Али Ахмети, новинарите Оливера Трајковска, Драган Павловиќ Латас, Ивона Талевска, бизнисменот Јордан Камчев, поранешниот премиер Хари Костов и други.
Тогаш Латас побара помош од СЈО и поднесе пријава, по што беше отворена предистражна постапка. Шефицата на СЈО ги повика и останатите оштетени да дадат исказ во обвинителството.
– Ги повикувам засегнатите поединци да дојдат во специјалното обвинителство за да поведеме соодветни кривични постапки. Истовремено, ги повикувам сите што поседуваат незаконски прибавени аудио и друг вид разговори помеѓу одредени лица истите да ги достават во најкраток можен рок до Специјалното обвинителство, повика тогаш Катица Јанева.
По една година од пријавата, по наредба на СЈО беше уапсен бизнисменот Љупчо Палевски – Палчо. Тогаш сите медиуми, повикувајќи се на неофицијални информации, објавија дека Палевски е уапсен како осомничен за објавување на овие „бомби“, затскривајќи се зад псевдонимот Никола Тесла. По дваесетина часа поминати во полициска станица, и четири часа во просториите на СЈО, Палевски беше пуштен на слобода.
Од домот на Палевски, истражителите на СЈО одзедоа и компјутери и мобилни телефони, но не беше откриено што пронашле во нив.
Сепак, во последниот извештај на СЈО, се дозна дека при неколку претреси за потребите на предистражни постапки биле одземени 98 електронски уреди, но не се посочуваше дали некои од овие уреди биле и од домот на Палевски. Од Обвинителството само откриваа дека за дел се завршени вештачењата.
– Веќе се изготвени и доставени вештачења од страна на МВР, а анализата и обработката ќе продолжи во следниот период при што се чека и да се достават вештачењата за уште вкупно 35 електронски уреди одземени при споменатите претреси, потенцираат од СЈО.
Неделникот ,,Фокус” тогаш открива дека СЈО има обезбедено голем број докази за осомничени што поседувале нелегално прислушувани разговори, а со кои наводно уценувале и рекетирале бизнисмени и политичари. Според нашите добро упатени извори, обезбедени се и докази и сведочења за извршените изнуди, како и пресметка за тоа колку пари се свртеле од „бизнисот“ со бомбите.
Од друга страна, пак, беше нејасно зошто тогаш СЈО овој предмет сѐ уште го држи во фаза на предистрага?
Поради недостиг од официјални информации, шпекулациите одеа дури дотаму дека се штити одреден осомничен, кој се поврзува со владин функционер. Односно, ако картите се отвореле до докрај, наводно, и оваа заштитена ѕверка би завршила зад решетки.
,,Фокус” тогаш обезбеди изјава и од Палчо, кој пак се жалеше дека одземената опрема од претресите не му е вратена.
За тоа, пак, дали е информиран до каде е предистражната постапка која СЈО ја води против него ни изјавил дека не знае ништо.
– Ниту сум повикан, ниту сум информиран за истрагата која беше отворена во август 2017 година. Огромна количина компјутери, лаптопи, вклучително и тие за производство на котли и обработка на челик од фирмата каде што работам, не се вратени, изјавил Палевски.
Тој појаснил и дека испратил две ургенции на писмено до СЈО, за тие што се прегледани, вештачени, да му се вратат, но не добил одговор.
Набрзо Палевски повторно беше уапсен, во полициска станица во Прилеп, откако претходно заедно со уште двајца пријатели на собир, на отворено, на разглас пуштаа телефонски разговори од актуелни и поранешни министри.
По 24 часа беше пуштен но без двата мобилни телефони кои му биле одземени.
На прашањето од каде тој ги добил бомбите, бидејќи дел за првпат се емитуваа, Палевски ни одговорил дека тој само ги репродуцирал.
– Јас само ги репродуцирав, веќе беа објавени на неколку социјални мрежи. Во тоа се уверија и инспекторите во Прилеп, видоа каде се објавени, односно дека јас не ги поседувам, изјавил тогаш нашиот соговорник, жалејќи се дека дотогаш му биле одземени 12 мобилни.
Денеска, министерот Оливер Спасовски кажа дека извршител на двете убиства, на убиството на малата Вања и на велешанецот Панче Жежовски, е првоосомничениот кој е во бегство, односно Палчо.
За него има информации дека е заминат за Србија, а потоа во Бугарија, поради што ќе биде распишана меѓународна потерница.
Валентина Вурмо