Акцијата на МВР во која беа приведени 20 лица во Дојран, откако кај нив била пронајдена дрога, се случувала за време на одржувањето на традиционалната и популарна манифестација Д Фестивал. Годинава, како и претходните на фестивалот во Дојран настапија голем број домашни и регионални музички ѕвезди.
Во текот на тридневниот настан, на сцената на Д Фестивал во Дојран продефилираа многу музички имиња- Фолтин, Галоски, Ива Лоренс, Симон Трпчески, С.А.Р.С., Кирил Џајковски, Сигала, Зарина Првасевда, Мартина Пенева, Паркети, Баклава, Аудиоцигла и многу други, односно се појавија над 50 артисти.
Фестивалот најчесто е опишан како спој на музика, театар, камп, плажа, уметност спорт и дружење. Според МВР, акцијата била со цел да се превенира недозволената продажба и употреба на наркотични средства меѓу младите, како најчести посетители на ваков тип музички манифестации. Посетителите на фестивалот, кај кои била пронајдена разновидна дрога, биле лишени од слобода, и по документирање на случаите против нив ќе биле поднесени соодветни пријави.
Вики Клинчарова