Британскиот премиер Борис Џонсон кажа денес дека не се сложува со одлуката на британскиот врховен суд дека суспензијата на парламентот не е во согласност со законот.
Тој е во Њујорк, каде учествува на 74 Генерално собрание на Обединетите нации.
Од кабинетот на британскиот премиер соопштија дека тој од Њујорк во Британија ќе се врати во текот на ноќта, порано од планираното.
Британскиот парламент утре продолжува со работа.
Џонсон во Њујорк кажа дека ќе ја почитува одлуката на судот, но навести дека повторно ќе се обиде да го суспендира парламентот.
„Не се согласувам со одлуката на правосудството. Не мислам дека е исправна, но ќе продолжиме понатаму, а парламентот нормално ќе се врати“, кажа тој и додаде дека мисли дека постојат добри услови да се продолжи со „говорот на кралицата“.
„Говорот на кралицата“ е вообичаена формалност за време на која се изнесува законодавниот план кој го составува владата.