На булеварот АСНОМ во општина Аеродром од утре ќе може да се користат по три коловозни ленти во двете насоки, пешачки и велосипедски патеки. Поставено е и средишно зеленило.
„По завршувањето на оваа фаза, булеварот преку новиот мост, којшто е веќе во изградба, треба да се поврзе со населбата Ќерамидница во општина Гази Баба, а оттука и Аеродром ќе добие нова сообраќајна релација кон Центар кај поранешен Скопски саем“, информираат од Град Скопје.
Викендов е завршена првата фаза од реконструкцијата на овој булевар на потегот од крстосницата со улица Васко Карангелевски до крстосницата со булевар Србија кај мостот Близнак.
„Само пред неполн месец, по отварањето на новиот булевар Христијан Тодоровски Карпош во Бутел и булеварот Никола Карев (познат како Пластичарска), за кратко време ова е веќе трета нова сообраќајница за развој на Скопје. Важно е да се напомене дека во моментот се работи и на четврт булевар, односно на втората фаза од изградбата на новиот булевар Босна и Хецеговина“, велат од Градот.