Следува мошне сериозна економска офанзива, имаме многу планови, дел од нив веќе се реализираат, меѓутоа еден дел ќе бидат пуштени во реализација од оваа есен и очекуваме да дадат сериозен импакт врз економското живеење во нашата држава, истакна вицепремиерот Кочо Анѓушев во интервју за МТВ.
-Имаме раст во индустриското производство, во извозот, вработени се 50.000 лица, од кои 48.000 во реалниот сектор. Значи, политиките даваат резултат. Практично, тоа е визија – да направиме реална економија, ориентирана кон приватниот сектор, кон оние што ќе обезбедат долгорочна стабилност. Ако како Влада правиме проекти за брз раст на економија, со кредити и проекти, тие проекти ќе завршат. Ќе имаат импакт и виртуелно, имаме раст, но што кога ќе завршат проектите? – рече Анѓушев.
Тој додаде дека во овој период се донесе Законот за енергетика, тече тендер за фотоволтаици, се водат процеси за инвестирање во ветерници итн.
-Би потсетил само на Законот за финансиска поддршка на инвестиции, каде што направивме една сериозна политика или еден сериозен импакт врз индустријализацијата на државата, што и дава резултат, бидејќи во моментот се градат триесетина фабрики во нашата држава, но и над 300 македонски компании се потпомогнати што не беше случај претходно. Направивме исчекор за сериозна помош за економијата и таа дава резултати – рече Анѓушев.