Премиерот Зоран Заев изјави дека очекува парламентарното мнозинство да остане стабилно, па дури и да расте, при што отвори простор за соработка и со поединци од опозициската ВМРО-ДПМНЕ.
-Отворени се вратите за соработка со сите. Владиното мнозинство треба да расте и треба да биде постабилно зашто пред Македонија се сериозни одлуки коишто треба да ги носиме. Остануваме отворени за разговор со сите, вклучително и за поединци од опозицијата предводена од ВМРО-ДПМНЕ. Зборувам генерално како луѓе со луѓе. Македонија е исправена пред сериозни реформи, ни требаат соработки. Знам дека доста нивни пратеници досега изразиле несогласување со политиките на ВМРО-ДПМНЕ и полека се оградуваат. Јас не претендирам тоа да значи нивно преминување во СДСМ, само барам соработка во интерес на граѓаните и на државата – рече Заев.
Воедно, лидерот на СДСМ истакна дека продолжува заедно во коалиција со ДУИ, но очигледно не планира да ја раскине коалицијата и со Алијансата за Албанците, имајќи во предвид дека изрази разбирање за нивната коалиција со БЕСА за вториот круг на локалните избори.