Директорката Јелена Жугиќ реагираше на вечерашниот перформанс на демонстрантите пред Театар Комедија. Згрозени од повикот на актерката за употреба на гумени куршуми врз демонстрантите од Шарената револуција, пред театарот со кој раководи таа тие напишаа „Куршумите живот значат даско една“.
Нејзиниот став ви го пренесуваме во целост:
-Вечерва таканаречената Шарена револуција го опфати и театарот Комедија. Институција која на никаков начин и со ниту една постапка не е ниту дел од причините ниту пак дел од решението на сето ова лудило кои неколкумина стотини сакаат да го наметнат на целата држава. Иронично, но оние кои се борат за некаква слобода се првите кои ја загрозуваат, оние кои се покриваат под пластот на демократијата се првите кои сакаат да ја убијат, ова не е битка за идеологија, ова е битка за лични интереси на поединци.
Под нивната гилотина денес се најде цела една институција само поради мој личен став, кое е мое лично право и израз на лична слобода. Вашата боја врз театарот Комедија господа, е ваш личен срам, и израз на немоќ. Бидејки само слабите не контираат со аргументи туку со аргументот на силата. Вашата боја е удар врз уметноста и слободниот театар, вашата боја е срамен шамар и за плејадата актерски имиња кои на свои плеќи го носеа и ќе продолжат да го носат театарот и да ја претставуваат нашата држава. Вашата боја е срамен однос кон институцијата која постигна и ќе продолжи да нижи постигнувања и успеси. Вашата боја е ваш срам, но и огледало на вашиот очај. Уметноста е вечна, и ќе ја надмине вашата малодушност.
Тргнете ги вашите раце од институцијата која не е моја, ниту само ваша, таа е на сите нас. Моите лични ставови се само мои, тие не се на театарот Комедија и оттука фрлањето со боја врз зградата на театарот го покажува заматениот ум и формите на притисок кои ги практикувате и ќе ви порачам вие нема да ме поколебате ниту исплашите, туку само ќе ми дадете потврда и стимул да продолжам да работам и создавам – порача Жугиќ.