Започна отстранувањето на цистерните со амонијак кај Пирот

Започна отстранувањето на вагон-цистерните со амонијак на пругата кај Пирот, во областа Сопотски Хан.

Автопатот кон Ниш нема да биде затворен и сообраќајот ќе се одвива нормално.

Прво, амонијакот ќе се префрли во камиони-цистерни, а потоа ќе се отстранат цистерните. Еден од првите чекори ќе биде преносот на содржината од цистерната број 13.

Во наредните денови, цистерните ќе се отстрануваат сукцесивно, една по една, соопштија од Штабот за вонредни состојби на Град Пирот.

На граѓаните им беше препорачано да не се приближуваат до локацијата Сопотски хан доколку не е апсолутно неопходно, како заради сопствената безбедност, така и поради непречената работа на стручните служби на терен, пренесе РТС.