Доцна синоќа четири шлепери со вода, како донација од компанијата ,,Кожувчанка” тргнаа кон Хрватска. Конвојот со помош за настраданите во земјотресот веќе пристигна, а градоначалникот на Кавадарци, Митко Јанчев, кој е управител на ,,Кожувчанка” вели дека тоа е најмалку што може да направи во овие тешки моменти за тамошниот народ.
-Оваа 2020 беше тешка година за сите. Тоа што се случи во Хрватска, страотниот земјотрес со човечки жртви и огромни материјални штети, само уште еднаш ни покажа дека мораме да бидеме солидарни, да сочувствуваме со туѓата болка, и секогаш кога сме во можност да помогнеме – вели Јанчев.
Кавадарци е збратимен град со Макарска, и општината заедно со Советот, во координација со градоначалникот на Макарска, решила да ги испрати шлеперите со вода за пиење.
-Изразуваме сочувство до семејствата на настраданите, и ова е најмалку што можеме да направиме за нашите пријатели од Хрватска. Овде сме да им помогнеме, да покажеме дека се грижиме и дека сочувствуваме со нивното страдање. Во знакот на солидарноста да ја испратиме оваа година, никогаш да не се повтори злото кое му се случи на човештвото, и сите да бидеме пред се, луѓе – ни изјави градоначалникот.
Вики Клинчарова