Власта на сите начини се обидува да го спречи штрајкот на СОНК

by Фокус 12:32
12:32

Градот Скопје и општините под водство на ВМРО ДПМНЕ, а такви се поголемиот дел, денеска пуштаат известувања до медиумите дека наставата во училиштата од второто полугодие ќе започне навремено, во вторник. Дури се соопштува дека ниту едно училиште и ниту една градинка не пријавиле штрајк, иако СОНК со денови зборува и го организира.

Градоначалникот на Скопје, Коце Трајановски, ја искористи заканата на Владата  дека ќе се обезбедат замени, за да ги спречи наставниците да штрајкуваат.

- Advertisements -

„Сакаме да информираме дека во вторник ќе започне второто полугодие од школската година и дека наставата ќе се одвива нормално во сите средни и основни училишта во Скопје, а ќе работат и сите градинки. Изминатава недела контактирани беа сите образовни институции во Скопје кои се опфатени со најавениот штрајк и досега не е пријавено од ниту една институција дека ќе се одржи штрајк. Доколку некои наставници сакаат да штрајкуваат, тоа е нивно право, а ние како надлежни институции, согласно законските прописи, ќе обезбедиме замени за сите што ќе штрајкуваат и наставата ќе се одвива нормално. Значи, сакаме да ги информираме сите ученици и нивните родители дека во Скопје второто полугодие ќе започне во вторник и наставата ќе се одвива нормално.“ – изјави градоначалникот Трајановски.

И покрај обидите на власта да го минимизира незадоволството кај наставниците и намерата да се ангажираат нови наставници на нивно место, СОНК не се откажува затоа што смета дека барањата на синдикатот се основани и нема да отстапат доколку не бидат целосно исполнети, а за тоа ја имаат и поддршката на меѓународната заедница.

„Од повеќе локални претставништва на СОНК стигнаа соопштенија дека се против штрајкот, но тој сепак нема да пропадне. Притисок има, а тој најчесто е од општинските власти и одредени партиски приврзаници блиски до власта.“- вели Јаким Неделков од СОНК.

 

Поврзани новости