Поп пејачката Викторија Лоба ќе ги затвори научно културните средби „Десет дена Крушевска република” со двочасовен концерт на 10-ти август. Нејзиниот настап ќе започне во 20.30 часот и Лоба вели дека конечно и се исполнила желбата да пее во Крушево.
-Одамна имам желба да настапам со концерт во прекрасното Крушево. Среќна сум што желбата ми се исполни оваа година и на 10-ти август ќе ја затворам манифестацијата „Десет дена Крушевска република”. На мојот концерт со љубов ќе се потрудам да и пренесам на публиката букет од убави емоции. За Крушево имам посебно избран репертоар кој изобилува со македонски изворни звуци, а секако ќе ги пеам и моите авторски песни – изјави за „Фокус” пејачката.
Пејачката која по потекло е од Русија, лани доби македонско државјанство. Тогаш ни изјави дека од свои осум години живее во Македонија и како ова е земјата во која што планира да живее, твори и придонесува.
-Од Русија се преселивме во Македонија заедно со мајка ми, која дојде овде поради професионален ангажман. Пред неколку месеци поднесов барање за добивање на државјанство и среќна сум што ми беше одобрено. Драго ми е што по 21 година живот во Македонија, добив и државјанство- ни раскажа тогаш Лоба.