Сателитските фотографии го покажуваат столбот од чад што се издига од Националниот парк Везув сè до Неаполскиот Залив. Три фронта на пожар остануваат активни. Канадери, хеликоптери и десетици волонтерски тимови остануваат распоредени, пишува Еуроњуз.
Пожарот што избувна во петокот вечерта во Националниот парк Везув продолжува да гори. Екстремно високиот столб од чад произведен од пожарот во националниот парк е видлив и од вселената. Сателитските фотографии што го прикажуваат Неаполскиот Залив со долг бел облак што се издига од едната страна на вулканот станаа вирални на интернет, демонстрирајќи ја сериозноста на пожарот и обемот на фронтот на пожарот.
Според информациите од префектот на Неапол, Микеле ди Бари, на крајот од состанокот на Центарот за координација на спасувањето, сè уште има три активни фронта: Вале дел Гиганте кон Монте Сома, каде што дејствуваат противпожарните авиони Канадер, јужната падина на кратерот, каде што регионалните хеликоптери на Цивилната заштита се борат со пламените јазици и областа Вичинале, каде што синоќешниот ветер повторно ги разгоре пламените јазици, кои беа гаснени од страна на копнени екипи.
Јавното обвинителство во Неапол, кое е одговорно за областа, отвори досие за да го разјасни потеклото на пожарот што ги уништува еден од пејзажните и културните симболи на земјата. Според досегашните сознанија, засега нема осомничени и не се идентификувани хипотези за криминал. Во исчекување е извештајот што ќе го презентираат шумарите на карабињерите.