Во две одвоени акции вчера се откриени и запленети вкупно околу 143 килограми марихуана, при што приведени се и осум лица од кои шестмина македонски државјани и двајца државјани на Република Албанија, соопшти денеска директорот на Бирото за јавна безбедност Лазо Велковски.
-Во првиот случај, по преземени мерки и активности од страна на полициските службеници од Одделот за криминалистичка полиција, а во содејство со СВР Охрид и СВР Тетово, пресечен е меѓународен канал за транспорт на марихуана од Албанија преку Македонија до соседна Грција. Запленети се 55 килограми марихуана, со вредност на нарко пазарот од околу 150.000 евра, а лишени од слобода се седум лица, од кои шест лица се македонски државјани и едно лице е албански државјанин – изјави тој.
Додаде дека вчера во Маврови Анови, во близина на браната, на патниот правец Дебар – Гостивар, приведени биле четири лица Е.Д. (31), Б.Р. (41), М.Р. (32) и И.Ј. (32) од село Студеничани, скопско, кои што со две патнички моторни возила марка „Ауди“ и „БМВ“ ја преземале марихуаната од Дебар и требало да ја транспортираат до Солун, за сума од 9.000 евра.
-Веднаш потоа, преземени се дополнителни активности на подрачјето на Дебар, при што од слобода е лишен Р.Д. (49) од с.Блата, Република Албанија, кој на илегален премин ја внел дрогата во државата. Од слобода се лишени уште две лица од Дебар, Ѓ.Ј. (27) и Ѓ.Ј. (26), кои ја преземале дрогата од државјанинот на Република Албанија и ја предале на лицата од Студеничани- рече Велковски.
Во вториот случај вчера околу 18,00 часот на Граничниот премин “Деве Баир“ од слобода е лишен М.М. (47), државјанин на Република Албанија.
-Полициски службеници од Одделот за сузбивање на организиран и сериозен криминал при МВР во соработка со Царинската управа, сопреле за преглед товарно моторно возило со приколка со албански национални и регистарски ознаки, управувано од приведениот. При прегледот дрогата во вкупна количина од 88 килограми, спакувана во најлонски фолии била откриена во внатрешноста на приколката – соопшти Велковски.
По целосно документирање на случаите против сите приведени лица, а во координација со надлежните Основни јавни обвинителства, ќе бидат поднесени пријави по член 215 од КЗ на РМ.