-Во принцип кога преговарате, велите зборот е збор. Ако се согласите за нешто, треба да се придржувате до тоа. Ако се договорите за крајниот рок, тој треба и да го почитувате. Во овој момент можам да кажам дека една од најголемите партии не почитува никаков краен рок и не го почитува договорот. Ова не е начин на кој треба да се преговара, изјави Питер Ванхојте, посредникот во преговорите за спроведување на договорот од Пржино.
На новинарско прашање која е партијата која не си стои на зборот, белгискиот експерт рече „Ваша работа е да откриете која е таа партија“.
Вечерва ќе продолжат преговорите, а Ванхојте информираше дека подготвен е предлог за промена на законот за да се овозможи избор на Специјалниот обвинител, а разговарано е и за одредени имиња.
Прашањето за тоа дали и колку заменици ќе има Специјалниот обвинител останува нерешено, но белгискиот експерт очекува вечерва да се дојде до договор и на таа тема.
