Има четворица заразени инструктори за попишување, кои се заразени од своите сопружници, рече директорот на Државниот завод за статистика Апостол Симовски. Според него, нема пречка да се реализира попишувањето.
-Протоколите за попис се јавно објавени, има различни протоколи за различни ситуации. Имате ситуации со лица во самоизолација, имате позитивни, имате ситуација каде има и заразени и здрави лица. Затоа некаде ќе се носат и скафандери при попишувањето – рече Симовски на Канал 5.
Ако некој не биде пронајден во својот дом, додаде тој, ќе му се остави известување за следна посета.
-Ќе знаеме на кои адреси какви лица има и ќе делуваме. Имаме голема количина средства за дезинфекција, имаме маски, мантили, скафандери и сето она што е неопходно. На терен попишувачите ќе имаат средства за секаква дезинфекција, како за маските, така за компјутерот и за сето останато. Попишувачот мора да носи маска, да дезинфицира раце пред да влезе, да ги замоли домаќините да стават меска – рече Симовски.