Советот на Општина Битола денеска се откажа од расправата за преземање мерки за намалување на енормното загадување на воздухот во градот, каде секојдневно концентрацијата на канцерогените ПМ 10 честички надминува и по десет пати над дозволеното.
Опозицијата предложи неколку конкретни мерки, но советниците од власта инсистираа да се повикаат стручњаци и подетално да се подготват материјалите за расправа во вторник, за кога е закажано продолжението на седницата.
СДСМ предложи краткорочни мерки, но и долгорочни проекти за кои побара да се издвојат 20 милиони денари за гасификација на градот.
Советниците од власта пак, рекоа дека загадувањето е глобален проблем и дека битолската локална власт презела сè што е потребно за подобрување на квалитетот на воздухот.
-Затоа бараме в понеделник да се состане комисијата за екологија и да ги разгледа краткорочните мерки што може да се преземат, така што оваа точка да остане за наредниот вторник- рече Соња Трпезановска, советничка од ВМРО-ДПМНЕ.
Загадувањето на воздухот е алармантно во сите поголеми градови, а по стапката на смртност како последица од него, Македонија е меѓу првите во Европа.
