Колеги од фолк естрадата, пријатели, познаници и фанови на социјалните мрежи се збогуваат со Зоран Дамјанов, кој вчера ненадејно почина во родното Кавадарци.
Блиски луѓе на музичарот, сеуште во шок, раскажуваат дека заминал брзо, како што живеел. Доживеал инфаркт во локална кафеана каде бил чест гостин, додека седел со пријатели.
,,Живееше брзо, бурно, боемски, така и замина. Имавме долгогодишна соработка, бевме блиски, го сакав како син. Ја отпеа мојата песна ,,Цветанке моја’’ со голем жар, и даде душа на песната и заслужено доби многу награди за неа. Сите сме длабоко потресени поради лошата вест’’ – ни изјави композиторот Ристо Вешков, кој што живее и работи во Америка, а при секоја посета на Кавадарци поминуваше доста време со Дамјанов.
Со емотивни пораки со пејачот се простија Милица Кузмановска, Иво Далтон, Васил Атанасов и многу други пејачи и композитори.
Во неговото родно Кавадарци често го споредуваа со легендарниот пејач Тома Здравковиќ, поради големиот талент, но и боемскиот начин на живот.
Во интервјуто од пред три години, во кое Дамјанов отворено проговори за проблемите со алкохолот, тој тврдеше дека е свесен како градот изгубил верба во него, и како по успешната рехабилитација максимално се труди да си ја поврати вербата од роднините, пријателите и сограѓаните.
,,Иако ми е тешко да се присетувам на сето тоа низ кое што минав поради алкохолот, сепак сакам да ја раскажам мојата приказна во која знам дека ќе се препознаат многумина. Кај нас алкохолот е лесно достапен, особено во моето родно Кавадарци, каде што речиси во секоја куќа се вари домашна ракија и се прави вино. Не сум единствениот кој што стигнал до бездната, ги има многумина кои што иако на почетокот на денот си ветуваат дека нема да ја земат чашката во рака, сепак на крајот завршуваат залиени со алкохол до таа мера, што не можат ниту името да си го напишат. Но најчесто кај нас тоа се проблеми кои што се туркаат под тепих и мнозинството смета дека е срамно да се збори за нив. Игнорирањето на зависноста од алкохолот никому не му прави добро и на некој начин себеси се гледам како среќен човек кој што навреме се соочи со вистината, а таа беше дека сум зависник и ми треба стручна помош за да си го спасам животот’’- раскажа Зоран за своите проблеми во 2014 година, потенцирајќи ни дека тоа го прави со цел да им помогне на сите кои се нашле во ситуација слична на неговата.
Дознаваме дека хуманитарниот фонд, кој што го покренаа кавадарчани кои живеат во Америка е со цел да се помогнат финансиски сопругата и децата близнаци на Зоран. Тој бил погребан денес на градските гробишта во Кавадарци.
Вики Клинчарова