Вчера девет лица загинаа во пукање во трговски центар северно од Далас, Тексас. На крајот полицијата го убила и напаѓачот, а жртвите биле на возраст од 5 до 51 година. Човек кој го посведочил пукањето, за CBS News изјавил дека тој бил еден од првите на местото на настанот и побрзал да го спаси својот син од продавницата за облека каде што започнал нападот.
Најмалку еден од убиените, рече Стивен Спајнхоуер, е дете, кое очајно се обидел да го спаси откако брзал во „H&M“ каде работел неговиот син. Непосредно пред тоа, околу 15 часот и 30 минути, Спајнхоуер добил повик од неговиот син кој го информирал дека пред продавницата се слушнале пукотници и дека неговиот братучед се уште е заробен внатре.
„Никогаш не замислував дека ќе бидам во позиција каде што ќе бидам првиот на сцената и ќе се грижам за луѓето“, рече тој, сеќавајќи се како неколку луѓе околу него снимиле видео од телото надвор од продавницата на неговиот син.
Додека тоа се случуваше, и пред да пристигнат другите полицајци, Спајнхоуер, кој е обучен за прва помош, се обиде да оживее повеќе луѓе погодени од огнено оружје, вклучувајќи и тројца за кои рече дека веќе не може да се спасат.
„Првата девојка кај која дојдов беше стуткана со главата покриена во грмушките, па почувствував пулс, ја повлеков главата на страна и видов дека нема лице“, вели тој за првата жртва на која наишол.
Никој не може да го види тоа што го видовме денес, а да не биде погоден од тоа“, рече тој и додаде дека настаните ќе ги памети засекогаш. „Тоа не е ситуација што никому би ја посакал, едноставно е незамисливо да се види масакрот“.
Илејн Пеникаро, исто така, опиша дека слушала постојани пукотници додека пазарела со нејзината ќерка. „Сите некако застанавме, а потоа една секунда подоцна, само „поп, поп, поп, поп, поп“, и имаше искри како да е точно пред нас“, изјави таа за Фокс њуз.
Брејсон Џонс, 17-годишник кој работел во продавницата „Champs Sports“, изјавил за New York Times дека слушнал „најверојатно околу 20 истрели“ и видел луѓе како излегуваат од продавницата. Тој додаде дека спасил случаен странец, за кој рече дека потрчал кон неговиот автомобил кога одекнале истрелите и го мавнале внатре.
Еден маж се упатил на местото на настанот откако неговата ќерка, која била во трговскиот центар, му испратила порака „Тато те сакам, има пукање“.
„Ќерка ми само ми испрати порака на мајка ѝ и мене и ми рече „тато, те сакам, има пукање и јас сум опкружен со полиција, само моли се за мене. Побрзавме таму и ја видовме полицијата пред нејзината врата. Ни кажаа дека сè уште ја бараат таа личност. Ова е Америка, луѓето умираат во болници, чекални и колеџи. Веќе нема безбедни места“, рече тој.
Други сведоци рекоа дека вработените во продавницата ги однеле до задниот дел од продавницата и излегле на тој начин откако полицијата соопштила дека е безбедно да се напуштат. „Денес е трагичен ден за градот Ален… Знаеме дека деновите што следат ќе бидат тешки и темни“, рече градоначалникот на Ален, Кевин Фулк.
Фото: Танјуг/АП