Поранешниот началник во МВР и поранешен помошник министер за внатрешни работи, Томе Милошевски се огласи на својот Фејсбук профил по вчерашната прес конференција на шефицата на СЈО во оставка, Катица Јанева.
„Катица што кажува не е битно. Сигурно нема да прифати вина. И јас, а верувам и вие така би постапиле. Битно е што кажува на спикерфонот во моментот кога се бројат парите. Онаа снимка за која зборува Вилма“, напиша Милошевски.
-„Оштетениот“ толку е итар што нема сигурно да ги даде парите, ако нема гаранција од другата страна на телефонот. Битно е дека безсрамно лажеше дека го изгубила мобилниот телефон, битно е дека навистина ги ослободи од притвор сите инволвирани во „Империја“ и им ги врати патните исправи, како што посакуваа двајцата притворени. А сето тоа таа не го направи од љубов спрема Боки 13. Тврдам дека „пријавителот“ на случајот „Рекет“ не е способен сам да снима разговори и средби. Тоа го направиле искусни луѓе, професионалци од безбедносните структури од една соседна земја. Да не заборавивте дека тие го „обезбедуваа“ пријавителот на случајот „Рекет“. Тие паралелно работеле и други оперативно-технички работи. Така што допрва ќе гледаме и слушаме снимки со разговори, слики и други инволвирани во случајот „Рекет“. А тие се во рацете на пријавителот. Тој ја води играта. Кај него се коцките. Сето ова е многу поголемо од Катица… Правда за сите! – напиша Милошевски на Фејсбук.