Полските власти се подготвени да распоредат американско нуклеарно оружје на нивна територија, изјави полскиот претседател Анджеј Дуда во интервју за весникот „Факт“.
„Доколку нашите сојузници решат да распоредат нуклеарно оружје во рамките на „Нуклеарното споделување“ и на наша територија со цел да ја зајакнеме безбедноста на источното крило на НАТО, ние сме подготвени за тоа. Ние сме сојузници во НАТО и имаме обврски во овој поглед, што значи дека ние едноставно спроведуваме заедничка политика“, објасни тој.
Според него, „ова прашање веќе некое време е тема на полско-американските разговори“.
„Веќе неколку пати зборував за тоа. Морам да признаам, кога ме прашаа за тоа, ја потврдив нашата подготвеност“, додаде тој.
Дуда тврди дека Русија се повеќе го зајакнува Калининградскиот регион од воен аспект.
„Неодамна Москва го префрли своето нуклеарно оружје во Белорусија“, посочи тој.
Програмата „Нуклеарно споделување“ им овозможува на Соединетите Американски Држави да го распоредат своето нуклеарно оружје во земјите на НАТО кои не го поседуваат. САД имаат 100 тактички нуклеарни проектили во Европа и Турција. Боевите глави се од 0,3 до 50 килотони за бомбите Б61-3 и Б61-4 и се чуваат во шест бази во Белгија, Германија, Италија, Холандија и Турција.