По само половина час од почетокот на денешната пленарна седница во Собранието, координаторот на една од пратеничките групи на ВМРО-ДПМНЕ, Антонио Милошоски, побара пауза од еден час. Како што рече тој, на пратениците им е потребна пауза за да се смират страстите во парламентот.
-Антонио не ти е потребна пауза за ова, да продолжиме со работа – проба да го разубеди собранискиот спикер, Талат Џафери, за да продолжи парламентот непречено да работи, но Милишоски не се откажа од своето барање.
Прва точка на седницата е измените на законот за медицински студии, но пратеничката од СДСМ, Фросина Ременски, се наврати на настаните од 27-ми април годинава со упадот на демонстранти во Собранието. На тоа Милишоски одговори дека пратениците од СДСМ сакаат да ги разгорат тензиите и ги обвини за редовно кршење на Деловникот.
На денешната расправа се предвидени и трите закони од социјалниот пакет од Владата на Заев. Се очекува денеска да бидат донесени законите за минимална плата, обештетување на стечајците и укинување на радиодифузната такса.