По 28 години Англија се пласираше во полуфинале на Светско првенство

by fokus 18:54
18:54
По 28 години пауза, Англија повторно ќе игра во полуфинале на Светското првенство. „Трите лава“ успеаја да ја совладаат репрезентацијата на Шведска со 2:0 и се пласираа во битката за медали на СП 2018. Погодоците за успехот ги постигнаа Хари Мегваер (30) и Деле Али (59).
Повторно, големиот адут на англискиот тренер Гарет Саутгејт беа прекините. Без многу да блескаат во нападот, Англичаните прагматично и ладнокрвно стигнаа до двата погодоци. Многу силен натпревар на голот имаше Џордан Пикфорд, кој ги спаси сите удари на шведските напаѓачи.
За последен пат, англискиот тим беше во топ 4 на светот во 1990 година на шампионатот во Италија. Тогаш Британците загубија несреќно во полуфиналето од Германија по пенали (3:4), а потоа изгубија 1:2 од „азурите“ во натпреварот за третото место.

Поврзани новости