Случајот со 11-годишната Ембла од Гостивар, девојче со Даунов синдром, против кое со петиција се кренаа родители на 11 нејзини соученици од основно училиште од Гостивар и не ја сакаат во иста училница со нивните деца, ја покажа грдата слика на општеството, во кое се уште има поединци кои не знаат за емпатија и прифаќање на различностите. За поддршка од нив пак, кон девојчето и нејзините родители, не може ниту да се зборува.
Сепак, како светла точка во светот на децата со посебни потреби и нивните родители, како и на сите луѓе кои имаат сомилост и разбирање за секој човек, доаѓа приказната од Струмица.
Анче Туфекџиева е мајка на Верче, девојче со Даунов синдром, кое сега е во осмо одделение и посетува редовна настава. За ,,Фокус” таа раскажа за личното искуство од училиштето на Верче.
-Уште кога за прв пат влеговме во училницата во редовното училиште, многу убаво бевме прифатени од сите. Верче секогаш е Верче за нејзините соученици, таа никогаш не е девојчето со Даунов синдром! Дури нејзините школски другарчиња се грижат за неа на одморите, поканета е на сите родендени, исто како што и кај нас е покането цело одделение.
Таа учи во Основното училиште Сандо Масев, но овде во Струмица е исто во сите училишта. Јавната свест за прифаќање на овие дечиња е на високо ниво.
Другарчињата на Верче и беа поддршка и на модната ревија посветен на различностите, тие се дел од нејзиниот живот- раскажува Анче, која е на чело на Здружението Вера, за поддршка на лица со Даунов синдром долги години наназад.
За настанот со Ембла, вели дека е разочарувачки, и дека е жално што во општеството има луѓе кои не ги научиле основните вредности на животот.
-Понекогаш си мислам добро е успеавме донекаде ние родителите на деца со попреченост да ја покренеме јавната свест и нашите деца да бидат прифатени во оваа општество…но баш тогаш ќе се појави некој ваков случај и ќе се запрашам Зошто? Што им згрешило ова дете на овие ,,11 мајки”???
Зарем има причина некое дете да биде различно од другите? Различно до тој степен па дури да биде изолирано во друга училница? Какви мајки се овие? Како ги учат своите деца на основните вредности на животот ? За вакви случаи потребна е поддршка од сите страни но мислам дека треба и одговорност на сите кои се соучесници во овој процес!
Жал ми е што живееме во општество во кое сеуште има луѓе кои не ги научиле основните вредности на животот! Да бев на местото на родителите на Ембла незнам дали исто така пожртвувано ќе реагирав,веројатно да,но знам едно дека таквата постапка од страна на другите родители нас многу не боли…затоа што ние од петни жили секојдневно се бориме со сите да покажеме дека и нашите деца можат и умеат само средината треба да им даде шанса да покажат!-појаснува мајката.
Додава дека во Струмица од второто полугодие, благодарение на градоначалникот Костадин Костадинов и на општината децата добиле персонални асистенти. Сепак апелира дека мора да се направи индивидуална програма која ќе им помогне на децата.
-Неопходно е да се направи индивидуална програма за овие деца, за да можат тие да се образуваат. Покрај социјалната инклузија, мора да добијат и образовна едукација! Да стекнат знаење и вештини, за да бидат самостојни. Најголемата болка на родителите е што ќе се случи кога еден ден нас ќе не нема, како ќе продолжат нашите деца. Затоа мора да се помогне во градењето на нивна независност со помош на индивидуални програми – изјави Туфекчиева.
Вики Клинчарова