Целта ни е јасна, реформите мора да продолжат и секоја институција треба да биде на ниво на задачата, особено законодавниот дом, зашто евроинтеграцијата е државен и тимски процес, порача денеска вицепремиерот за европски прашања Бојан Маричиќ, отворајќи ја денешната дебата „Зелена агенда – обновливи ресурси, македонска храна, европски пазар“.
Како што рече Маричиќ, обврската што ја презема оваа Влада е тешка, но развојот, просперитетот, европската економија и европскиот животен стандард се приоритет.
-Знаеме дека обврската што ја преземаме е тешка, но знаеме и која ни е целта – развој, просперитет, европска економија, европски пазари и европски животен стандард за граѓаните до крајот на 2030 година, амбициозна, но достижна цел која само бара посветеност и ангажман на сите општествени чинители. Тоа не е само обврска кон ЕУ и преговорите за членство, туку е и наша должност и обврска кон граѓаните, потенцира Маричиќ.