Точно на пладне денесека во Скопје, освен „Парадата на гордоста“, се одржа и контра настан „Сведоштво за семејството“.
Оваа парада ја предводеше тапанар, облечен во традиционална носија, а по него чекореа повозрасни граѓани и деца.
“Сојузот за живот“ го сочинуваат повеќе невладини организации, движења и неформални групи кои се залагаат за заштита на вредностите на традицоналното семејство и бракот.
– Во духот на заштита на вредностите на бракот и семејството како граѓани и верници сме тука да го засведочиме највредното за нас. Нашата порака пред се е до луѓето кои ги носат одлуките во државата, сегашната, но и идните власти, како и до целата македонска јавност дека најголем процент од верниците не го прифаќаат процесот што треба да доведе до редефинирање на тоа што е брак, семејство, пол и род – изјави за МИА, отец Ивица Тодоров.
Според него, граѓанско-верскиот собир не е противтежа на најавената Парада на гордоста што исто така денеска треба да се одржи во Скопје.
– Ние не сме против никого, но не ја прифаќаме пораката на процесот што некои структури сакаат да го започнат конкретно со Парадата на гордоста – рече отец Тодоров.
Граѓанско-верскиот собир започна со литургија во црквата „Света Богородица“. По нејзиното завршување, според најавите, поворката со поддржувачите на „Сојузот за живот“, ќе се упати на марш низ центарот на Скопје каде меѓу останатото ќе помине покрај републичкото Собрание и Владата. Маршот ќе заврши пред соборниот храм „Свети Климент Охридски“ со читање на заедничка декларација за живот.