Меѓу 5 и 7 септември 2025 година, Кавадарци ќе биде центар на Македонија со одржувањето на Тиквешкиот гроздобер – фестивал кој ја слави лозарската и винската традиција на регионот.
Кавадарци придонесува со приближно една третина од вкупното производство на грозје во Македонија, а најзастапени сорти се Вранец, Смедеревка и автохтоната Станушина, како и Темјаника, Каберне Совињон, Мерло и Шардоне.
Тиквешки гроздобер: Од древните лозја до денешната магија на Кавадарци
Последните години се бележи раст на пласманот и извозот, благодарение на соработката меѓу лозарите и винариите, но и поддршката од општината и државата. Младите сè повеќе се вклучуваат во лозарството преку грантови и едукативни програми.
„Младите генерации се клуч за одржливо и конкурентно земјоделство, затоа вложуваме во нивна обука и поддршка“, истакнуваат организаторите.
Иако постојат предизвици како климатски ризици и нестабилни пазарни услови, се инвестира во инфраструктура, технологија и модернизација. Општината обезбедува подобри патишта, финансиска и логистичка поддршка, грантови за семејни винарии и организира советувања.
Гроздоберот е место каде традицијата се спојува со иднината – со цел Кавадарци и понатаму да остане срцето на македонското лозарство и винска култура.
Годинашниот Тиквешки гроздобер доаѓа со свежа енергија, новитети и традиционални вредности. На 5 септември ќе се одржи „Тиквешка трпеза“ – долга заедничка трпеза на улица Илинденска со специјалитети од тиквешки домаќинки и ресторани, традиционален македонски појадок, музика во живо и костими од традицијата. Друг новитет е „Кралско вино“ – тајна дегустација во затворена зона, со слепо тестирање на вина и награда за најуспешните дегустатори.
Се очекуваат над 100.000 посетители, со учество на над 10 странски делегации и 15 карневалски групи од Федерацијата на европските карневалски градови. Фестивалот значи меѓународна промоција на градот, туризам и економски раст. Буџетот за организација изнесува 7.000.000 денари, а дополнителни средства доаѓаат од донации.
Настанот обезбедува платформа за локални производители, ги промовира културното и историско наследство на регионот, а учеството на локалните музички групи го одржува музичкиот и културниот идентитет на Тиквешкиот гроздобер. Во програмата се традиционален кошаркарски турнир „Сестри Китеви“, таблијада, изложби, култниот Тиквешки Карневал и изложба на олдтајмери со над 100 автомобили, со директен ефект врз локалната економија и туризам.
Три дена Кавадарци ќе биде сцена, легенда и семејна трпеза за сите што ќе дојдат. „Тиквешкиот гроздобер“ во септември е срцето на Македонија што чука силно, со ритамот на музиката, смеата и доброто вино.
—